റേഷന്‍കടകളിലെ ഇ-പോസ് മെഷീനുകള്‍ ഏപ്രില്‍ ഒന്നുമുതല്‍ എഇപിഡിഎസ് സോഫ്റ്റ്‌വെയറിന്റെ ഏറ്റവും പുതിയ വേര്‍ഷനിലേക്ക് മാറും. സാങ്കേതിക സൗകര്യങ്ങള്‍ ഒരുക്കുന്ന ഹൈദരാബാദ് എന്‍ഐസിയ്ക്ക് ഇതുസംബന്ധിച്ച് നിര്‍ദേശം നല്‍കിയതായി ഭക്ഷ്യമന്ത്രി ജി ആര്‍ അനില്‍ വ്യക്തമാക്കി.
ഇ-പോസ് മെഷീന്റെ തകരാറിന് പരിഹാരം കാണുന്നതിന്റെ ഭാഗമായി ചേര്‍ന്ന യോഗത്തിനുശേഷം നടത്തിയ വാര്‍ത്താ സമ്മേളനത്തിലാണ് മന്ത്രി ഇക്കാര്യം വ്യക്തമാക്കിയത്. ഇ-പോസ് മെഷീനുകളില്‍ തകരാര്‍ സംഭവിക്കുന്നത് റേഷന്‍ വിതരണത്തെ കാര്യമായി ബാധിച്ച പശ്ചാത്തലത്തിലായിരുന്നു യോഗം. ഇന്റര്‍നെറ്റ് സര്‍വീസ് പ്രൊവൈഡറായ ബിഎസ്എന്‍എല്‍ നിലവില്‍ നല്‍കി വരുന്ന 20 എംബിപിഎസ് സ്പീഡ് ഈ മാസം 20 മുതല്‍ 100 എംബിപിഎസ് ആയി ഉയര്‍ത്തും. സ്ഥലത്ത് പ്രവര്‍ത്തിക്കുന്ന മൊബൈല്‍ നെറ്റ്‌വര്‍ക്ക് ഏതാണെന്ന് കണ്ടെത്തി അത്തരം കമ്പനികളുടെ സിം കാര്‍ഡ് ആയിരിക്കണം ഇ-പോസ് മെഷീനില്‍ ഉപയോഗിക്കേണ്ടത്.
ഏപ്രില്‍ ഒന്നുമുതല്‍ 30 വരെയുള്ള കാലയളവില്‍ ഇ-പോസ് മെഷീനുകളുടെ സര്‍വീസ് ക്യാമ്പ് സംഘടിപ്പിക്കുന്നതിനും ഇ-പോസ് മെഷീനുകളുടെ തകരാര്‍ വിളിച്ചുപറയുന്നതിന് ഹെല്‍പ്പ് ഡസ്‌ക് കാര്യക്ഷമമാക്കാനും യോഗത്തില്‍ തീരുമാനമായി. മന്ത്രിയുടെ നേതൃത്വത്തില്‍ നടന്ന യോഗത്തില്‍ എന്‍ഐസി ഹൈദരാബാദ്, ഐടി മിഷന്‍, കെല്‍ട്രോണ്‍, സി ഡാക്, ബിഎസ്എന്‍എല്‍ എന്നിവയിലെ ഉദ്യോഗസ്ഥര്‍ പങ്കെടുത്തു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
