ഒട്ടേറെ നേട്ടങ്ങള്‍ ഇന്ത്യന്‍ സിനിമയ്ക്ക് സമ്മാനിച്ചാണ് 95-ാമത് ഓസ്‌കാര്‍ കടന്നുപോകുന്നത്. രണ്ട് ഓസ്‌കാര്‍ പുരസ്‌കാരങ്ങള്‍ ഇന്ത്യയിലേക്കെത്തിയപ്പോള്‍ മറ്റൊരു അഭിമാന മുഹൂര്‍ത്തത്തിനും നാം സാക്ഷ്യം വഹിച്ചു. അത് മറ്റൊന്നുമല്ല, അവതാരകയായി ഓസ്‌കാര്‍ വേദിയില്‍ തിളങ്ങിയ നടി ദീപിക പദുക്കോണ്‍ തന്നെയാണ്. ഓസ്‌കാറില്‍ മികച്ച ഗാനത്തിനുള്ള പുരസ്‌കാരം നേടിയ ആര്‍.ആര്‍.ആറിലെ നാട്ടു നാട്ടു എന്ന ഗാനത്തിന്റെ പെര്‍ഫോമന്‍സിന് മുന്‍പ് ഗാനം പരിചയപ്പെടുത്തിയാണ് ദീപിക വേദിയില്‍ എത്തിയത്. ഇതിന്റെ വീഡിയോ സമൂഹമാധ്യമങ്ങളില്‍ ഇപ്പോള്‍ വൈറലാണ്. വളരെ രസകരമായാണ് ദീപിക നാട്ടു നാട്ടു എന്ന പാട്ടിനെ പരിചയപ്പെടുത്തിയത്. സദസിന്റെ കയ്യടിയും നേടി.
ഓസ്‌കാര്‍ പുരസ്‌കാര നിശയില്‍ ആകെ പതിനാറ് അവതാരകരാണ് ഉണ്ടായിരുന്നത്. അക്കൂട്ടത്തിലെ ഏക ഇന്ത്യന്‍ സാന്നിധ്യമായിരുന്നു ദീപിക. കറുത്ത വസ്ത്രത്തില്‍ ആയിരുന്നു ദീപിക വേദിയില്‍ പ്രത്യക്ഷപ്പെട്ടത്. ദീപികയുടെ ഓസ്‌കാര്‍ റെഡ് കാര്‍പ്പറ്റിലെ ചിത്രങ്ങളും വൈറലാണ്.
ഇന്ത്യയുടെ അഭിമാനമായി ദീപിക ഇതിനുമുന്‍പും പലതവണ ലോകലേദിയില്‍ എത്തിയിട്ടുണ്ട്. ഖത്തര്‍ ലോകകപ്പ് ഫൈനല്‍ വേദിയില്‍ മുന്‍ സ്പാനിഷ് ഫുട്ബോള്‍ താരം ഐക്കര്‍ കാസിയാസിനൊപ്പം ലോകകിരീടം അനാവരണം ചെയ്തത് ദീപികയായിരുന്നു. 75-ാമത് കാന്‍ ഫിലിം ഫെസ്റ്റിവലില്‍ ജൂറി അംഗവുമായിരുന്നു ദീപിക. ഇപ്പോള്‍ ഇതാ വീണ്ടും ഇന്ത്യയുടെ അഭിമാനമായി മാറിയിരിക്കുകയാണ് ദീപിക പദുക്കോണ്‍.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
