എം.ടി വാസുദേവന്‍ നായരുടെ വിയോഗത്തില്‍ അനുസ്മരിച്ച് മന്ത്രി എ.കെ ശശീന്ദ്രന്‍. കോഴിക്കോട്ടുകാരനായി ജീവിച്ച് കോഴിക്കോടന്‍ വികാര വിചാരങ്ങളെ മലയാളി മനസുകളിലേക്ക് എത്തിക്കുന്നതിനുള്ള ഒരു വലിയ ഇടപെടല്‍ അദ്ദേഹം തന്റെ രചനയിലൂടെ നടത്തിയിട്ടുണ്ടെന്ന് മന്ത്രി പറഞ്ഞു.
മന്ത്രിയുടെ വാക്കുകള്‍
‘ഞാനൊരു ആരാധകനും അദ്ദേഹമൊരു മഹാമനുഷ്യനുമാണ്. ഞങ്ങള്‍ തമ്മില്‍ സൗഹൃദം എന്ന് പറയുന്നത് പ്രയോഗിക്കാന്‍ കഴിയുന്ന ഉചിതമായ വാക്കാണോ എന്നറിയില്ല. ഞാനും അദ്ദേഹവും കോഴിക്കോട് ജനിച്ചിട്ടില്ല. കോഴിക്കോട്ടുകാരനായി ജീവിച്ച് കോഴിക്കോടന്‍ വികാര വിചാരങ്ങളെ മലയാളി മനസുകളിലേക്ക് എത്തിക്കുന്നതിനുള്ള ഒരു വലിയ ഇടപെടല്‍ അദ്ദേഹം തന്റെ രചനയിലൂടെ നടത്തിയിട്ടുണ്ട്. നമ്മുടെ ഗ്രാമീണ ജീവിതത്തിന്റെ നേര്‍കാഴ്ചകളാണ് അദ്ദേഹത്തിന്റെ എഴുത്തിലെ പ്രധാനപ്പെട്ട ഭാഗം. ഒരു വിമര്‍ശകന്‍ എന്ന നിലയില്‍ അദ്ദേഹം രാഷ്ട്രീയമുള്‍പ്പെടെയുള്ള കാര്യങ്ങള്‍ നിരീക്ഷിക്കുകയും അഭിപ്രായം പറയേണ്ടിടത്ത് മാത്രം അഭിപ്രായം പറയുകയും ചെയ്യുന്ന മിതഭാഷിണിയായ വിമര്‍ശകനായിരുന്നു. അതുകൊണ്ട് തന്നെ അദ്ദേഹത്തിന്റെ ഓരോ വാക്കിനും ഓരോ അക്ഷരത്തിനും അതിന്റേതായ കരുത്തും വ്യാപ്തിയുമുണ്ട് എന്ന് കേരളം പലപ്പോഴും അറിഞ്ഞിട്ടുള്ളതാണ്. ഇനി ആരില്‍ നിന്നാണ് അങ്ങനെയൊരു അനുഭവം ഉണ്ടാവുക എന്നതാണ് നമുക്ക് അന്വേഷിക്കാനുള്ളത്. നോക്കുമ്പോള്‍ മുന്‍പില്‍ ശൂന്യത മാത്രമാണ്. അദ്ദേഹത്തിന്റെ വിയോഗം മലയാളത്തിനുള്ള നഷ്ടമാണ്’. മന്ത്രി കൂട്ടിച്ചേര്‍ത്തു.
വാർധക്യസഹജമായ അസുഖങ്ങളെത്തുടർന്ന് കോഴിക്കോട് സ്വകാര്യ ആശുപത്രിയിൽ ചികിത്സയിലായിരുന്ന എം ടി വാസുദേവൻ നായർ (91) ക‍ഴിഞ്ഞദിവസം രാത്രി പത്ത് മണിയോടെയായിരുന്നു വിടപറഞ്ഞത്.
1933 ജൂലായ് 15-ന് പൊന്നാനി താലൂക്കിലെ കൂടല്ലൂരിൽ ടി നാരായണന്‍ നായരുടെയും അമ്മാളു അമ്മയുടെയും നാല് ആണ്‍മക്കളില്‍ ഇളയ മകനായിട്ടാണ് മാടത്ത് തെക്കേപ്പാട്ട് വാസുദേവന്‍ നായരെന്ന എംടിയുടെ ജനനം. മലമക്കാവ് എലിമെന്ററി സ്‌കൂള്‍, കുമരനെല്ലൂര്‍ ഹൈസ്‌കൂള്‍ എന്നിവിടങ്ങളിലെ പ്രാഥമിക വിദ്യാഭ്യാസത്തിനുശേഷം പാലക്കാട് വിക്ടോറിയ കോളേജില്‍നിന്ന് 1953-ല്‍ രസതന്ത്രത്തില്‍ ബിരുദം നേടി. കോളേജ് വിദ്യാഭ്യാസത്തിന് ശേഷം സ്‌കൂള്‍ അധ്യാപകനായി. സ്‌കൂള്‍ കാലംമുതല്‍ എ‍ഴുത്തിന്‍റെ ലോകത്തേക്ക് പേന ചലിപ്പിച്ചു തുടങ്ങി. എംടിയുടെ ആദ്യകഥ വിക്ടോറിയ പഠനകാലത്ത് പ്രസിദ്ധീകരിച്ച ‘രക്തം പുരണ്ട മണ്‍തരികള്‍ ആയിരുന്നു. 1958-ല്‍ പ്രസിദ്ധീകരിച്ച ‘നാലുകെട്ട്’ ആണ് ആദ്യം പുസ്തകരൂപത്തില്‍ പ്രസിദ്ധീകരിച്ചത്. 1959-ലെ കേരള സാഹിത്യ അക്കാദമി പുരസ്കാരം ഇത് നേടി. മലയാള സാഹിത്യത്തിൽ കഥകളുടെ പെരുന്തച്ചന്‍റെ യാത്രകൾക്ക് പ്രൗഢമായ തുടക്കം.
കേന്ദ്ര സാഹിത്യ അക്കാദമി അവാര്‍ഡ് നേടിയ കാലം (1969), വയലാര്‍ അവാര്‍ഡ് നേടിയ രണ്ടാമൂഴം (1984) , എൻപി മുഹമ്മദും ചേർന്ന് എഴുതിയ അറബിപ്പൊന്ന് (1960), അസുരവിത്ത് (1962), മഞ്ഞ് (1964), വിലാപയാത്ര (1978), വാരാണസി (2002) എന്നിവയാണ് പ്രധാന കൃതികൾ. ഓടക്കുഴല്‍ അവാര്‍ഡ് നേടിയ വാനപ്രസ്ഥം, രക്തം പുരണ്ട മണ്‍ത്തരികള്‍, വെയിലും നിലാവും , വേദനയുടെ പൂക്കൾ, നിന്റെ ഓര്‍മയ്ക്ക്, ഓളവും തീരവും, ഇരുട്ടിന്റെ ആത്മാവ്, കുട്ട്യേടത്തി, നഷ്ടപ്പെട്ട ദിനങ്ങള്‍, ബന്ധനം, പതനം, കളിവീട്, ഡാർ എസ് സലാം, അജ്ഞാതന്റെ ഉയരാത്ത സ്മാരകം, അഭയം തേടി വീണ്ടും, സ്വര്‍ഗം തുറക്കുന്ന സമയം, ഷെര്‍ലക് തുടങ്ങി നിരവധി കഥകളും എംടിയുടെ തൂലികയില്‍ പിറന്നു. മലയാളസാഹിത്യത്തിനു നൽകിയ അമൂല്യ സംഭാവനകൾ കണക്കിലെടുത്ത് 1996-ൽ കാലിക്കറ്റ് സർവ്വകലാശാല ബഹുമാനസൂചകമായി ഡി.ലിറ്റ്. ബിരുദം നൽകി ആദരിച്ചു. 1995-ലെ ജ്ഞാനപീഠ പുരസ്കാരം അദ്ദേഹത്തിനു ലഭിച്ചു. 2005-ൽ പത്മഭൂഷൺ നൽകി എംടിയിലെ പ്രതിഭയെ ഭാരതസർക്കാർ ആദരിക്കുകയുണ്ടായി.
മലയാള സിനിമയിലും അമൂല്യമായ സംഭാവനകൾ നൽകിയ വ്യക്തിത്വമായിരുന്നു എംടി. 1963-64 കാലത്ത് സ്വന്തം കഥയായ ‘മുറപ്പെണ്ണ്’ തിരക്കഥയെഴുതി എംടി ചലച്ചിത്രലോകത്തു പ്രവേശിച്ചു. 1973-ൽ ആദ്യമായി സംവിധാനം ചെയ്ത് നിർമ്മിച്ച ‘നിർമാല്യം’ എന്ന ചിത്രത്തിന് രാഷ്ട്രപതിയുടെ സ്വർണ്ണപ്പതക്കം ലഭിച്ചു. അമ്പതിലേറെ തിരക്കഥകളെഴുതിയിട്ടുള്ള അദ്ദേഹത്തിന് നാലുതവണ ഈ മേഖലയിൽ ദേശീയപുരസ്കാരം ലഭിച്ചു. കടവ്‌, ഒരു വടക്കൻ വീരഗാഥ, സദയം, പരിണയം തുടങ്ങിയ ചിത്രങ്ങൾക്കും ദേശീയപുരസ്കാരം ലഭിച്ചു.
ഒരു മാസത്തിനിടെ ഒന്നിലധികം തവണ എംടിയെ ആശുപത്രിയിൽ പ്രവേശിപ്പിച്ചിരുന്നു. ഹൃദ്രോഗവും ശ്വാസതടസവും അനുഭവപ്പെട്ടതിനെ തുടർന്നാണ് 11 ദിവസമായി അദ്ദേഹം ആശുപത്രിയിൽ കഴിയുകയായിരുന്നു. ആരോഗ്യ നില ഗുരുതരമാണെന്നും ഹൃദയസ്തംഭനം ഉണ്ടായെന്നും അറിയിച്ചുകൊണ്ട് കഴിഞ്ഞ ദിവസം രാവിലെ മെഡിക്കല്‍ ബുള്ളറ്റിനും ആശുപത്രി അധികൃതര്‍ പുറത്തിറക്കിയിരുന്നു. ഭാര്യ: കലാമണ്ഡലം സരസ്വതി. മക്കൾ: സിതാര, അശ്വതി.
mt vasudevan nair passes away, mt vasudevan nair, books of mt vasudevan nair, famous novels of mt vasudevan nair, mt vasudevan nair books in malayalam, mt vasudevan nair books malayalam, mt vasudevan nair famous books, mt vasudevan nair famous novels, mt vasudevan nair in malayalam, mt vasudevan nair novel, mt vasudevan nair novels in malayalam, mt vasudevan novels, vasudevan nair books
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
