കോൺഗ്രസിനെ വെട്ടിലാക്കിയ രണ്ട് വാർത്തകൾ: എഐസിസി നേതൃത്വത്തിന്റെ പ്രതികരണം അറിയാൻ താല്പര്യമുണ്ടെന്ന് എഎ റഹീം എംപി

കേരള രാഷ്ട്രീയത്തിൽ കഴിഞ്ഞ ഏതാനും ദിവസങ്ങളായി കോൺഗ്രസ് പാർട്ടിയെ ചുറ്റിപ്പറ്റിയുള്ള വാർത്തകളും അഭ്യൂഹങ്ങളും ശക്തമാക്കുകയാണ്. കഴിഞ്ഞ ദിവസം ഗവർണർ ആരിഫ് മുഹമ്മദ് ഖാനെ പുകഴ്ത്തികൊണ്ട് രംഗത്ത് വന്ന തിരുവഞ്ചൂർ രാധാകൃഷ്ണനാണ് വിവാദങ്ങൾക്ക് തിരികൊളുത്തിയത്. ഈ പ്രതികരണത്തിൽ നിന്നും കൈകഴുകാൻ ശ്രമിക്കുന്നതിനിടെയാണ്  കേരളത്തിൽ നിന്നുള്ള ഒരു കോൺഗ്രസ്സ് എം പി ബിജെപിയിൽ ചേരാൻ നീക്കം നടത്തുന്നു എന്ന വാർത്ത ഇന്ന് ഒരു ദേശീയ മാധ്യമം റിപ്പോർട്ട് ചെയ്തത്.

ALSO READ: യുവാവിന്റെ പീഡന പരാതി; സംവിധായകൻ രഞ്ജിത്തിന് താത്കാലിക മുൻ‌കൂർ ജാമ്യം

ഇതോടെ ആകെ കുരുക്കിലായിരിക്കുകയാണ് കോൺഗ്രസ്. പക്ഷെ എഐസിസിയുടെ ഭാഗത്ത് നിന്നും ഇതുവരെ ഈ വാർത്തകളോട്  യാതൊരു തരത്തിലുള്ള പ്രതികരണവും വന്നിട്ടില്ല. ഈ രണ്ട് വിഷയങ്ങളിലും എഐസിസി നേതൃത്വം നൽകുന്ന പ്രതികരണം എന്താണെന്ന് അറിയാൻ താത്പര്യമുണ്ടെന്നാണ് എഎ റഹീം എംപി   ഇപ്പോൾ പ്രതികരിച്ചിരിക്കുന്നത്. ഫേസ്ബുക്ക് പോസ്റ്റിലൂടെയാണ് അദ്ദേഹം എഐസിസിയുടെ പ്രതികരണം ആരാഞ്ഞത്.

എഎ റഹീമിന്റെ ഫെയ്സ്ബുക്ക് കുറിപ്പ്: 

കഴിഞ്ഞ ദിവസമാണ് ശ്രീ തിരുവഞ്ചൂർ രാധാകൃഷ്ണൻ സംഘപരിവാറിന് പ്രിയപ്പെട്ട ഗവർണർ തുടരണം എന്ന് ആവർത്തിച്ചു ആവശ്യപ്പെട്ടത്.ഇന്നത്തെ ഇന്ത്യൻ എക്സ്പ്രസ്സ്‌ റിപ്പോർട്ട് പ്രകാരം കേരളത്തിൽ നിന്നുള്ള ഒരു കോൺഗ്രസ്സ് എം പി ബിജെപിയിൽ ചേരാൻ നീക്കം നടത്തുന്നു.രണ്ടു വാർത്തകളിലും എ ഐ സി സി നേതൃത്വത്തിന്റെ പ്രതികരണം അറിയാൻ താല്പര്യമുണ്ട്.