ഹൈദരാബാദ്: ബംഗ്ലാദേശിനെതിരായ മൂന്നാം ടി20യിൽ ഇന്ത്യയുയ‍ർത്തിയ 298 എന്ന ലക്ഷ്യം മറികടക്കാനാകാതെ ബംഗ്ലാകടുവകൾ. നിശ്ചിത ഓവറിൽ 7 വിക്കറ്റ് നഷ്ടത്തിൽ 164 റൺസിന് ബംഗ്ലാദേശിന്റെ പോരാട്ടം അവസാനിച്ചു. 47 പന്തിൽ 111 റൺസ് നേടിയ സഞ്ജുവിന്റെ സെഞ്ച്വറി കരുത്തിലാണ് ഇന്ത്യ കൂറ്റൻ സ്കോർ പടുത്തുയർത്തിയത്. ഇന്ത്യക്കായി രവി ബിഷ്ണോയ് 2 വിക്കറ്റെടുത്തു.
ടോസ് നേടിയ ഇന്ത്യൻ ക്യാപ്റ്റൻ സൂര്യകുമാർ യാദവ് ബാറ്റിങ് തെരഞ്ഞെടുക്കുകയായിരുന്നു. തുടക്കത്തിലെ ഓപ്പണർ അഭിഷേക് ശർമ്മയെ നഷ്ടമായെങ്കിലും പിന്നാലെയെത്തിയ സൂര്യകുമാർ യാദവും സഞ്ജു സാംസണും ചേർന്ന് ബംഗ്ലാദേശ് ബോളർമാരെ അടിച്ചൊതുക്കുകയായിരുന്നു. 10-ാം ഓവറിൽ ബംഗ്ലാ ബോളർ റിഷാദ് ഹൊസൈനെ ഒരോവറിൽ അഞ്ച് സിക്സ് പറത്തിയിരുന്നു സഞ്ജു. ഇതടക്കം എട്ട് സിക്സും പതിനൊന്ന് ഫോറും അടങ്ങുന്നതാണ് സഞ്ജുവിന്റെ ഇന്നിങ്സ്. 35 പന്തിൽ 75 റൺസ് അടിച്ച സൂര്യകുമാർ യാദവും ബംഗ്ലാ ബോളർമാരെ ശരിക്കും ശിക്ഷിച്ചു. പുറകെയെത്തിയ റിയാന്‍ പരാഗും, ഹര്‍ദിക് പാണ്ഡ്യയും ബാറ്റിങ് വെടിക്കെട്ട് തുടരുകയായിരുന്നു. പരാഗ് 13 പന്തില്‍ നിന്ന് 34 റൺസും. പാണ്ഡ്യ 18 പന്തില്‍ നിന്ന് 47 റൺസും അടിച്ചുകൂട്ടി.
മറുപടി ബാറ്റിങ്ങിനിറങ്ങിയ ബംഗ്ലാനിരയിൽ തൗഹിദ് ഹൃദോയും (63) ലിറ്റൺ ദാസും (42) പൊരുതി നോക്കിയെങ്കിലും ബംഗ്ലാകടുവകളുടെ ചെറുത്ത് നിൽപ്പ് 164 ൽ അവസാനിച്ചു. ഇന്ത്യക്കായി രവി ബിഷ്ണോയ് 3 വിക്കറ്റും മായങ്ക് യാദവ് 2 വിക്കറ്റും വാഷിങ്ടൺ സുന്ദറും നിതീഷ് കുമാർ റെഡ്ഡിയും ഒരു വിക്കറ്റ് വീതവും വീഴ്ത്തി.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
