ബിജെപി സര്‍ക്കാരിന്റെ നീക്കം സംശയാസ്പദമെന്ന് സിപിഐഎം ജനറല്‍ സെക്രട്ടറി സീതാറാം യെച്ചൂരി. ബിജെപി സര്‍ക്കാരിന്റെ ഭാരത് പ്രയോഗം സംശയാസ്പദമാണ്. പ്രതിപക്ഷ സഖ്യത്തിന്റെ പേര് ഭാരത് എന്നാക്കിയാല്‍ ബിജെപി അതും മാറ്റുമോയെന്നും യെച്ചൂരി ചോദിച്ചു.
അതേസമയം രാഷ്ട്രപതിക്ക് പിന്നാലെ പ്രധാനമന്ത്രി നരേന്ദ്ര മോദിയുടെ ഔദ്യോഗിക കുറിപ്പിലും ഭാരത് പ്രയോഗം. ആസിയാന്‍- ഇന്ത്യാ സന്ദര്‍ശനത്തിനായി ഇന്തോനേഷ്യയിലേക്ക് പോകുന്ന ഔദ്യോഗിക കുറിപ്പിലാണ് പ്രൈംമിനിസ്റ്റര്‍ ഓഫ് ഭാരത് എന്ന് മോദി രേഖപ്പെടുത്തിയത്. പാര്‍ലമെന്റിന്റെ പ്രത്യേക സമ്മേളനത്തില്‍ ഭാരത് പ്രയോഗത്തെ സംബന്ധിച്ച് പ്രമേയം കൊണ്ടുവരുമെന്നാണ് സൂചന.
ഇന്ത്യയുടെ പേര് ഭാരത് എന്നാക്കി മാറ്റാനുളള ആര്‍എസ്എസ് അജണ്ട ബിജെപി സര്‍ക്കാര്‍ തുടങ്ങിയിട്ട് നാളുകളായെങ്കിലും ഇപ്പോള്‍ പ്രത്യക്ഷമായി നീക്കം നടത്തുവെന്നതാണ് ശ്രദ്ധേയം. സെപ്റ്റംബര്‍ 9ന് നടക്കുന്ന അത്താഴവിരുന്നിലേക്ക് ജി 20 നേതാക്കളെ ക്ഷണിച്ചുകൊണ്ടുളള കത്തില്‍ രാഷ്ട്രപതി ദ്രൗപതി മുര്‍മു പ്രസിഡന്റ് ഓഫ് ഭാരത് എന്നാണ് രേഖപ്പെടുത്തിയത്. ഇതില്‍ വലിയ വിമര്‍ശനങ്ങള്‍ രാജ്യമെങ്ങും ഉയരുമ്പോഴാണ് പ്രധാനമന്ത്രി നരേന്ദ്രമോദിയും തന്റെ ഓദ്യോഗിക കുറിപ്പില്‍ ഭാരത് എന്ന് പ്രയോഗിച്ചിരിക്കുന്നത്. ഇന്നും നാളെയുമായി ജക്കാര്‍ത്തയില്‍ നടക്കുന്ന 20മത് ആസിയാന്‍- ഇന്ത്യാ സന്ദര്‍ശനത്തിനായുളള ഓദ്യോഗിക കുറിപ്പിലാണ് പ്രൈം മിനിസ്റ്റര്‍ ഓഫ് ഭാരത് എന്ന് രേഖപ്പെടുത്തിയിരിക്കുന്നത്. 18 മുതല്‍ 22 വരെ നടക്കുന്ന പാര്‍ലമെന്റിന്റെ പ്രത്യേക സമ്മേളനത്തില്‍ ഇതിനായി പ്രമേയം അവതരിപ്പിച്ചേക്കും. അങ്ങനെയെങ്കില്‍ ഈ നീക്കം തടയാനുളള ഒരുക്കങ്ങള്‍ പ്രതിപക്ഷ പാര്‍ട്ടികളും തുടങ്ങിക്കഴിഞ്ഞു. തങ്ങളുടെ മുന്നണിക്ക് ഇന്ത്യ എന്ന് പേരിട്ടതോടെ വിറളി പിടിച്ചാണ് നരേന്ദ്ര മോദി രാജ്യത്തിന്റെ പേര് മാറ്റുന്നതെന്ന് പ്രതിപക്ഷ നേതാക്കള്‍ ആരോപിച്ചു.
READ ALSO:‘പ്രൈംമിനിസ്റ്റര്‍ ഓഫ് ഭാരത്’: ഇന്തോനേഷ്യയിലേക്ക് പോകുന്ന ഔദ്യോഗിക കുറിപ്പിലും പ്രയോഗം
ജി 20 നടക്കുന്ന വേദിയുടെ പേരും ഭാരത് മണ്ഡപം എന്നാണ്. മാത്രമല്ല ഉച്ചകോടിയില്‍ പ്രതിനിധികള്‍ക്ക് വിതരണം ചെയ്യുന്ന സംക്ഷിപ്ത രേഖകളിലും ഭാരത് എന്നാണ് വിശേഷിപ്പിച്ചിരിക്കുന്നത്. ഭരണഘടനയുടെ ആര്‍ട്ടിക്കിള്‍ ഒന്നില്‍ ചേര്‍ത്തിരിക്കുന്ന ഇന്ത്യ, അതാണ് ഭാരത് എന്നത് നീക്കം ചെയ്ത് ഭാരത് എന്ന വാക്ക് മാത്രമാക്കി മാറ്റാനുളള സംഘപരിവാര്‍ അജണ്ട ഭരണഭേദഗതിയിലൂടെ നടപ്പാക്കാനൊരുങ്ങുകയാണ് കേന്ദ്രസര്‍ക്കാര്‍.
READ ALSO: ‘പേര് മാറ്റം അഭ്യൂഹം മാത്രം’, എന്തെങ്കിലും ഉണ്ടെങ്കിൽ കേന്ദ്രം അറിയിക്കും: അനുരാഗ് ഠാക്കൂര്‍
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
