കലോത്സവത്തെ വിജയകരമാക്കാൻ പ്രയത്നിച്ച എല്ലാവരെയും അഭിനന്ദിച്ച് മുഖ്യമന്ത്രി പിണറായി വിജയൻ. തൻ്റെ ഫേസ്ബുക്ക് പേജിൽ കുറിച്ച കുറിപ്പിലൂടെയാണ് മുഖ്യമന്ത്രി കലോത്സവത്തിന് പിന്നിൽ പ്രവർത്തിച്ച മുഴുവൻ ആളുകളെയും അഭിനന്ദിച്ചത്. കേരള സമൂഹത്തിൻ്റെ പ്രബുദ്ധതയുടെ പ്രതിഫലനമായി ഈ കലോത്സവമെന്നും സർഗപ്രതിഭകൾക്ക് ഈ മികവ് പഠനത്തിലും മുന്നോട്ടുള്ള ജീവിതയാത്രയിലും തുടരാനാകട്ടെയെന്ന് മുഖ്യമന്ത്രി തൻ്റെ ഫേസ്ബുക്ക് പേജിൽ കുറിച്ചു.
മുഖ്യമന്ത്രി പിണറായി വിജയൻ്റെ ഫേസ്ബുക്ക് കുറിപ്പ് പൂർണ രൂപത്തിൽ:
63-ാമത് സംസ്ഥാന സ്കൂൾ കലോത്സവത്തിൻ്റെ സമാപനത്തോടെ കലാനൈപുണിയുടെ ഉത്സവനാളുകൾക്കാണ് തിരശ്ശീല വീണത്. സർഗപ്രതിഭകൾ തലസ്ഥാന നഗരിയുടെ വിവിധ ഭാഗങ്ങളിലായി ഒരുക്കിയ മത്സരവേദികളിൽ മാറ്റുരച്ചത് ആരോഗ്യകരമായ മത്സരബുദ്ധിയോടെയായിരുന്നു. പഠനത്തിലും ഇനിയങ്ങോട്ടുള്ള ജീവിത യാത്രയിലും ഈ മികവ് പുലർത്താൻ ഭാവി തലമുറയ്ക്ക് സാധിക്കട്ടെ.
കലോത്സവത്തെ വലിയ വിജയമാക്കാൻ അഹോരാത്രം പ്രയത്നിച്ച വിദ്യാഭ്യാസ വകുപ്പ്, ജനപ്രതിനിധികൾ, രാഷ്ട്രീയ, സാംസ്‌കാരിക പ്രമുഖർ, സംഘടനാ പ്രതിനിധികൾ, വളന്റിയർമാർ, പൊലീസ്, ഹരിതകർമ സേനാംഗങ്ങൾ തുടങ്ങിയ എല്ലാവർക്കും അഭിനന്ദനങ്ങൾ. ഏഷ്യയിലെ തന്നെ ഏറ്റവും വലിയ കൗമാര കലാമേളയെ നാടാകെ നെഞ്ചേറ്റിയതിൻ്റെ ദൃഷ്ടാന്തമായിരുന്നു മത്സരവേദികളിലേക്ക് ഒഴുകിയെത്തിയ ജനാവലി. കേരള സമൂഹത്തിൻ്റെ പ്രബുദ്ധതയുടെ പ്രതിഫലനം കൂടിയായി കലോത്സവം മാറി. സർവോപരി മേളയെ ഏറ്റെടുത്ത തിരുവനന്തപുരത്തുകാരും പ്രശംസയർഹിക്കുന്നു.
കലോത്സവത്തിൽ പങ്കാളികളാവുകയും വിജയം നേടുകയും ചെയ്ത എല്ലാ മത്സരാർഥികൾക്കും അഭിനന്ദനങ്ങൾ. ഈ അഞ്ചു നാളുകൾ നൽകിയ അനുഭവങ്ങളും അറിവുകളും നാളെ നമ്മുടെ നാടിനെ നയിക്കാൻ നിങ്ങൾക്ക് കരുത്താകട്ടെ എന്നാശംസിക്കുന്നു. കൂടുതൽ പോയിൻ്റുകൾ നേടി ഒന്നാമതെത്തിയ തൃശൂർ ജില്ലയ്ക്കും രണ്ടാമതെത്തിയ പാലക്കാട് ജില്ലയ്ക്കും മൂന്നാമതെത്തിയ കണ്ണൂർ ജില്ലയ്ക്കും അനുമോദനങ്ങൾ.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
