കുസാറ്റ് ദുരന്തം; തൃക്കാക്കര എസിപി ഹൈക്കോടതിയിൽ റിപ്പോർട്ട് സമർപ്പിച്ചു

കഴിഞ്ഞവർഷം നവംബർ 25ന് നടന്ന കുസാറ്റ് ദുരന്തത്തിലാണ് കൊച്ചി അസിസ്റ്റൻറ് പോലീസ് കമ്മീഷണർ ഹൈക്കോടതിയിൽ റിപ്പോർട്ട് സമർപ്പിച്ചത്. ആയിരം പേർക്ക് പങ്കെടുക്കാൻ ആകുന്ന ഓഡിറ്റോറിയത്തിൽ നാലായിരത്തോളം പേർ തള്ളിക്കയറിയതാണ് ദുരന്തത്തിന്റെ മുഖ്യകാരണം. സംഗീത പരിപാടിയിൽ പങ്കെടുക്കാൻ ക്യാമ്പസിന് പുറത്ത് നിന്നും ആളുകൾ എത്തി. പങ്കെടുക്കുന്ന ആളുകളുടെ എണ്ണം മുൻകൂട്ടി കാണാൻ സാധിക്കാത്തത് സംഘാടക പിഴവായി. ഓഡിറ്റോറിയത്തിലേക്കുള്ള പടികളുടെ നിർമാണത്തിലെ അപാകതയും അപകടത്തിന് കാരണമായി. തിരക്ക് നിയന്ത്രിക്കാൻ സംഘാടകർ കൂടുതൽ പേരെ നിയോഗിച്ചില്ല. ചുമതലപ്പെടുത്തിയ അധ്യാപകർ സംഭവം നടക്കുമ്പോൾ ക്യാമ്പസിൽ ഉണ്ടായിരുന്നില്ല. സംഗീത നിശയിൽ പങ്കെടുക്കുന്നവരുടെ എണ്ണം സംബന്ധിച്ച് പൊലീസ് സ്റ്റേഷനിൽ സംഘാടകർ അറിയിച്ചില്ല. മതിയായ ആസൂത്രണമോ സംഘാടനമോ ഉണ്ടായില്ല എന്നും പൊലീസ് റിപ്പോർട്ടിൽ പരാമർശിക്കുന്നു.