സൂപ്പർ കാറുകളെ കുറിച്ച് സംസാരിക്കാൻ തുടങ്ങിയാൽ ‘ജെൻ സി’ പിള്ളേരെ പോലും നാണിപ്പിക്കും ഈ വൈറൽ അമ്മൂമ്മമാർ. പോര്‍ഷേ, ഫെറാറി, ലംബോര്‍ഗിനി, മക്‌ലാരന്‍ തുടങ്ങി സകല സൂപ്പര്‍ കാറുകളെക്കുറിച്ചും കൊച്ചുമകന് പറഞ്ഞു കൊടുക്കുന്ന അമ്മൂമ്മമാരെക്കണ്ട് ഞെട്ടിയിരിക്കുകയാണ് സൈബർലോകം. പോർഷെ വേണോ, മക്ലാരൻ വേണോ എന്ന ചോദ്യത്തിന് ഉത്തരം നൽകുന്ന വീഡിയോ ചുരുങ്ങിയ സമയത്തിനുള്ളിൽ തന്നെ പതിനായിരങ്ങളാണ് കണ്ടത്.
ആനന്ദ് എന്ന് പേരുള്ള യുവാവാണ് ഇന്‍സ്റ്റഗ്രാം പേജിലൂടെ വിഡിയോ പങ്കുവച്ചത്. ഒരു വീഡിയോയില്‍ പോര്‍ഷെ കാറിനെക്കുറിച്ചാണ് കൊച്ചുമകന് അമ്മൂമ്മമാരോട് ചോദിക്കുന്നത്. ‘പോര്‍ഷെ നല്ല വണ്ടിയാണല്ലോ പക്ഷേ എല്ലാവരുടെയും കയ്യിലുണ്ടല്ലോ’ എന്നാണ് ഒരമ്മൂമ്മ പറയുന്നത്. ‘പോര്‍ഷെ നല്ല വണ്ടിയാ മോനേ പക്ഷേ, അതിന്‍റെ ഡോറ് മോളിലോട്ട് പോകില്ലല്ലോ. അതുകൊണ്ടു മോനൊരു മക്‌ലാരന്‍ എടുക്ക്’ എന്നാണ് രണ്ടാമത്തെ അമ്മൂമ്മ പറയുന്നത്.
ALSO READ; വെറും 39,999 രൂപക്ക് ഇലക്ട്രിക് സ്കൂട്ടറുമായി ഒല; ബുക്കിങ് ആരംഭിച്ചു
തുടർന്ന് വീഡിയോയിൽ തന്‍റെ പുതിയ മക്ലാരൻ 756 എൽടി ഏറ്റുവാങ്ങുന്ന കൊച്ചുമകന്‍റെയും കുടുംബാംഗങ്ങളുടെയും ദൃശ്യമാണുള്ളത്. കേരളത്തിലെ ആദ്യത്തേതും ഇന്ത്യയിലെ തന്നെ മൂന്നാമത്തേതും മക്‌ലാരന്‍ 756 എല്‍ടി സ്വന്തമാക്കുന്ന ഏറ്റവും ചെറിയ പ്രായക്കാരനാണ് ആനന്ദ്. മറ്റൊരു വീഡിയോയിൽ ലംബോർഗിനിയുടെ വിവിധ മോഡലുകളിൽ മരുഭൂമിയിൽ ഡ്രിഫ്റ്റിങ് ആസ്വദിക്കുന്ന അമ്മൂമ്മമാരെയും കാണാം. വീഡിയോക്ക് താ‍ഴെ നിരവധി പേരാണ് രസകരമായ കമന്‍റുകളുമായെത്തിയത്.
മക്ലാരൻ 720 എസിന്റെ ഹൈപെർഫോമൻസ് മോഡലാണ് 765 എൽടി. പ്രത്യേക പതിപ്പായി ഇറങ്ങിയ വാഹനത്തിന്റെ വളരെ കുറച്ചെണ്ണം മോഡലുകൾ മാത്രമേ ലോകത്തുള്ളൂ. ലോകത്തിലെ ഏറ്റവും മികച്ച സ്പോർട്സ് കാറുകളിൽ ഒന്നായ ജിടിയ്ക്ക് കരുത്ത് പകരുന്നത് 4.0 ലീറ്റർ വി8 എൻജിനാണ്. പൂജ്യത്തിൽ നിന്നും 100 കിലോമീറ്റർ വേഗം കൈവരിക്കാൻ 2.8 സെക്കൻഡുകൾ മാത്രം മതി ഇവന്. 327 കിലോമീറ്റർ വേഗത്തിൽ വരെ പായാൻ ഇതിനാകും.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
