കലോത്സവ സമാപനം; തിരുവനന്തപുരത്തെ സ്കൂളുകൾക്ക് നാളെ അവധി

സംസ്ഥാന സ്കൂൾ കലോത്സവത്തിൻ്റെ സമാപന ദിവസമായ നാളെ ജില്ലയിലെ സ്കൂളുകൾക്ക് അവധി പ്രഖ്യാപിച്ചു. സിബിഎസ്ഇ സ്കൂളുകൾക്ക് അവധി ബാധകമല്ല.

അതേസമയം സംസ്ഥാന സ്‌കൂള്‍ കലോല്‍സവം അവസാനിക്കാന്‍ ഒരു ദിവസം ബാക്കിനില്‍ക്കെ സ്വര്‍ണക്കപ്പിനായി ഇഞ്ചോടിഞ്ച് പോരാട്ടമാണ് നടക്കുന്നത്.. 801 പോയിന്റ് വീതം നേടി തൃശൂരും കണ്ണൂരുമാണ് മുന്നില്‍. 795 പോയിന്റ് നേടി കോഴിക്കോടും പാലക്കാടും തൊട്ടുപിന്നിലുണ്ട്. മലപ്പുറത്തിന് 772 പോയിന്റും കൊല്ലത്തിന് 775 പോയിന്റുമാണുള്ളത്. എറണാകുളം (772), തിരുവനന്തപുരം (769), ആലപ്പുഴ (763), കാസര്‍ഗോഡ് (731), വയനാട് (733), കോട്ടയം (735), പത്തനംതിട്ട (684), ഇടുക്കി (639) എന്നീ ജില്ലകളാണ് തുടര്‍ന്നുള്ള സ്ഥാനങ്ങളില്‍.

ALSO READ; ഇനി അന്യമല്ല ഈ ഗോത്രകല; കലോത്സവ വേദിയിലെത്തിയ മലപ്പുലയ ആട്ടത്തെപ്പറ്റി അറിയാം

ഹൈസ്‌കൂള്‍ വിഭാഗത്തില്‍ 392 പോയിന്റുമായി തൃശൂരും കോഴിക്കോടും ഹയര്‍സെക്കന്‍ഡറി വിഭാഗത്തില്‍ 401 പോയിന്റുമായി കണ്ണൂരുമാണ് ഒന്നാമത്. ഹൈസ്‌കൂള്‍ വിഭാഗത്തില്‍ 390 പോയിന്റമായി കണ്ണൂര്‍ രണ്ടാമതും ഹയര്‍സെക്കന്‍ഡറി വിഭാഗത്തില്‍ 399 പോയിന്റുള്ള തൃശൂരാണ് രണ്ടാം സ്ഥാനത്ത്.

ഹൈസ്‌കൂള്‍ വിഭാഗം അറബിക് കലോത്സവത്തില്‍ കണ്ണൂര്‍, കോഴിക്കോട്, എറണാകുളം ജില്ലകള്‍ 90 പോയിന്റ് വീതം നേടി മുന്നിലാണ്. ഹൈസ്‌കൂള്‍ വിഭാഗം സംസ്‌കൃതം കലോത്സവത്തില്‍ 80 പോയിന്റ് വീതം നേടിയ മലപ്പുറം, പാലക്കാട്, കാസര്‍ഗോഡ് ജില്ലകളാണ് മുന്നില്‍.

സ്‌കൂളുകളില്‍ ആലത്തൂര്‍ ബിഎസ്എസ് ഗുരുകുലം ഹയര്‍സെക്കന്‍ഡറി സ്‌കൂള്‍ 128 പോയിന്റോടെ ഒന്നാമതാണ്. 98 പോയിന്റ് നേടിയ തിരുവനന്തപുരം വഴുതക്കാട് കാര്‍മല്‍ ഹയര്‍സെക്കന്‍ഡറി സ്‌കൂളാണ് രണ്ടാം സ്ഥാനത്ത്.