ഹൃത്വിക് റോഷന്റെ ആദ്യ ചിത്രമായ കഹോ നാ പ്യാര്‍ ഹേ കാൽ നൂറ്റാണ്ട് തികയുന്ന അവസരത്തിൽ റീ റിലീസിനൊരുങ്ങുന്നു. ജനുവരി 10ന് ഈ ചിത്രം റിലീസ് ചെയ്തിട്ട് 25 വര്‍ഷം പൂര്‍ത്തിയാകുകയാണ്. ഹൃത്വിക് റോഷന്റെ ജന്മദിനത്തോടനുബന്ധിച്ച് ചിത്രം വീണ്ടും റിലീസ് ചെയ്യുകയാണെന്ന് പിവിആര്‍ ഐനോക്‌സ് അറിയിച്ചു. ഹൃത്വിക് റോഷന്റെ പിതാവും ചലച്ചിത്ര നിര്‍മാതാവുമായ രാകേഷ് റോഷന്‍ തന്നെയാണ് മകനെ വച്ച് ഈ മ്യൂസിക്കല്‍ റൊമാന്റിക് ത്രില്ലര്‍ സംവിധാനം ചെയ്തത്. 2000 ജനുവരി 14നാണ് സിനിമ റിലീസായത്. രാജേഷ് റോഷനായിരുന്നു സംഗീതം. ചിത്രത്തിനോടൊപ്പം തന്നെ ഇതിലെ പാട്ടുകളും ഹിറ്റായി മാറി.
ഹൃത്വിക്കിനൊപ്പം അമീഷ പട്ടേലിന്റെയും അരങ്ങേറ്റ ചിത്രം കൂടിയായിരുന്നു ഇത്. അനുപം ഖേര്‍, ഫരീദ ജലാല്‍, സതീഷ് ഷാ, മൊഹ്‌നിഷ് ബാല്‍, ദലിപ് താഹില്‍, ആശിഷ് വിദ്യാര്‍ഥി, വ്രജേഷ് ഹിര്‍ജി എന്നിവര്‍ ചിത്രത്തില്‍ പ്രധാന വേഷങ്ങള്‍ ചെയ്തു. കോയി മില്‍ ഗയ, ലക്ഷ്യ, ജോധാ അക്ബര്‍, ധൂം 2, ക്രിഷ്, സിന്ദഗി ന മിലേഗി ദോബാര എന്നീ ചിത്രങ്ങളിലെ അഭിനയത്തിലൂടെ പ്രശസ്തനായ ഹൃത്വിക് റോഷന്‍ തന്റെ അഭിനയ ജീവിതത്തില്‍ 25 വര്‍ഷം പൂര്‍ത്തിയായതിനെ അതിശയകരം എന്നാണ് വിശേഷിപ്പിച്ചത്.
ALSO READ; ബ്ലോക്ക്ബസ്റ്റര്‍ ത്രില്ലര്‍, നാലു ദിനം കൊണ്ട് നല്ലുഗ്രന്‍ കളക്ഷന്‍; ഐഡന്റിറ്റി അടിപൊളിയാണ്!
‘കഴിഞ്ഞ രണ്ടര പതിറ്റാണ്ടുകളായി ഒരു നടനായി ജീവിക്കാന്‍ അവസരം ലഭിച്ചത് ശരിക്കും അനുഗ്രഹമാണ്. കഹോ ന പ്യാര്‍ ഹേ എന്റെ ആദ്യ ചിത്രമായിരുന്നു. എന്റെ ഹൃദയത്തില്‍ ഏപ്പോഴും ഒരു വലിയ സ്ഥാനമുണ്ടാകും. ചിത്രം വീണ്ടും തിയേറ്ററില്‍ എത്തിച്ചുകൊണ്ട് ഈ ആഘോഷം സംഘടിപ്പിക്കുന്നതിന് പിവിആര്‍ ഐനോക്‌സിന് നന്ദി പറയുന്നു’ – ഹൃത്വിക് പറഞ്ഞു.
25 വര്‍ഷങ്ങള്‍ക്ക് ശേഷവും ഒരു സിനിമ ആഘോഷിക്കപ്പെടുന്നത് ഏറ്റവും മഹത്തായ കാര്യമാണെന്ന് പിതാവ് രാകേഷ് റോഷന്‍ പറഞ്ഞു. സിനിമ വീണ്ടും വരുമ്പോള്‍ ഒരുപാട് ഓര്‍മകള്‍ തിരികെ വരുന്നതായും അദ്ദേഹം കൂട്ടിച്ചേർത്തു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
