നീണ്ട 14 വര്‍ഷത്തെ ഐതിഹാസികമായ റയല്‍ മാഡ്രിഡ് കരിയറിന് വിരാമമിട്ടുകൊണ്ട് സൗദി ക്ലബ് അല്‍ ഇത്തിഹാദിലേക്ക് ചേക്കേറാനുണ്ടായ സാഹചര്യം വിശദീകരിച്ച് ഫ്രഞ്ച് വെറ്ററന്‍ സ്‌ട്രൈക്കര്‍ കരീം ബെന്‍സേമ.സൗദിയിലെ ഏറ്റവും മികച്ച ക്ലബുകളിലൊന്നാണിത്. ഏറ്റവും കൂടുതല്‍ ട്രോഫികളുള്ളതും വലിയ ആരാധകവൃന്ദവുമുള്ള ക്ലബ്. ഇവിടെ എനിക്കും കിരീടങ്ങള്‍ നേടാന്‍ കഴിയുമെന്ന് വിശ്വസിക്കുന്നു വെന്നായിരുന്നു ബെന്‍സേമ നൽകിയ മറുപടി.
എന്നെ സംബന്ധിച്ചിടത്തോളം പുതിയൊരു അധ്യായമാണിത്. ഫുട്‌ബോള്‍ എനിക്ക് ജീവനാണ്. എന്റെ പരിധിക്കപ്പുറം മികവ് ഉയര്‍ത്താനാണ് ശ്രമിച്ചിട്ടുള്ളത്.” ബെന്‍സേമ അല്‍ ഇത്തിഹാദിന്റെ ഔദ്യോഗിക യൂട്യൂബ് ചാനലുമായി സംസാരിക്കവെ വ്യക്തമാക്കി.
അതേസമയം, എന്തുകൊണ്ട് സൗദിയെന്ന ചോദ്യത്തിനും ബെന്‍സേമ ഉത്തരം നല്‍കി. ”ഞാനൊരു മുസ്ലിമാണ്, സൗദി ഒരു ഇസ്ലാമിക രാഷ്ട്രമാണ്. ഇവിടെ ജീവിക്കാന്‍ ഞാനിഷ്ടപ്പെടുന്നു. എനിക്ക് പ്രിയപ്പെട്ട രാജ്യമാണിത്. ഞാന്‍ സൗദി ക്ലബില്‍ കളിക്കുന്ന കാര്യം കുടുംബവുമായി ചര്‍ച്ച ചെയ്തപ്പോള്‍ അവര്‍ക്കും ഏറെ സന്തോഷം.” ബെന്‍സേമ പറഞ്ഞു
ഹോം ടൗണ്‍ ക്ലബായ ലിയോണില്‍ നിന്ന് 2009ലായിരുന്നു റയല്‍ മാഡ്രിഡിലേക്ക് കരീം ബെന്‍സേമയുടെ വരവ്. സ്പാനിഷ് ക്ലബില്‍ ഇതിഹാസ താരങ്ങളുടെ പട്ടികയില്‍ സ്ഥാനം പിടിച്ചു. നിലവില്‍ ലോക ഫുട്‌ബോളില്‍ ഏറ്റവും കൂടുതല്‍ പ്രതിഫലം വാങ്ങുന്ന രണ്ടാമത്തെ താരമായ ബെന്‍സേമ റയല്‍ കുപ്പായത്തില്‍ 657 മത്സരങ്ങളില്‍ 353 ഗോളുകളുമായി ക്രിസ്റ്റ്യാനോ റൊണാള്‍ഡോയ്ക്ക് പിന്നില്‍ ക്ലബിന്റെ രണ്ടാമത്തെ ഉയര്‍ന്ന ഗോള്‍വേട്ടക്കാരനായി.
Also Read: അന്ന് 29 പന്തില്‍ 71 ഇന്നലെ 71 പന്തില്‍ 29 ; രഹാനെ അത്ഭുതപ്രതിഭാസമെന്ന് ആരാധകര്‍
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
