രാജ്യത്തിനെയാകെ നടുക്കത്തിലാക്കിയാണ് കുവൈറ്റിലെ കെട്ടിടത്തിലെ തീപിടിത്ത വാര്‍ത്തയെത്തിയത്. മരിച്ചവരില്‍ ഭൂരിഭാഗവും ഇന്ത്യക്കാര്‍. അതില്‍ മലയാളികളാണെന്ന വാര്‍ത്ത ഞെട്ടലോടെയാണ് മലയാളികളും കേട്ടത്. ജോലിഭാരമെല്ലാം തീര്‍ത്ത് നാട്ടിലേക്ക് മടങ്ങുന്ന ദിവസത്തിനായി കാത്തിരുന്നവരാണ് മരിച്ചവരിലേറെയും. അതിലൊരാളാണ് മരിച്ച പത്തനംത്തിട്ട കോഴഞ്ചേരി കീഴ്‌വായ്പൂര്‍ സ്വദേശി സിബിന്‍ ടി എബ്രഹാം.
മരിക്കുന്നതിന് മണിക്കൂറുകള്‍ക്ക് മുമ്പ് ഭാര്യയുമായി സംസാരിച്ചിരുന്നു സിബിന്‍. വരുന്ന ആഗസ്റ്റ് 18നാണ് സിബിന്റെ കുഞ്ഞിന്റെ ഒന്നാം പിറന്നാള്‍. പിറന്നാള്‍ ആഘോഷിക്കാനായി നാട്ടിലെത്താന്‍ കാത്തിരിക്കുകയായിരുന്നു കുടുംബവും. എന്നാല്‍ മകന്റെ വിയോഗ വാര്‍ത്ത അറിഞ്ഞ് ഇപ്പോഴും വിശ്വസിക്കാന്‍ കഴിയാതെ നിറകണ്ണുകളോട് കൂടിയിരിക്കുകയാണ് പിതാവ് എബ്രഹാം.
താന്‍ ജോലി ചെയ്ത അതേ കമ്പനിയില്‍ മകനും ജോലി കിട്ടിയപ്പോള്‍ എബ്രഹാമിന് ആശ്വാസമായിരുന്നു, ഒപ്പം സന്തോഷവും. താന്‍ ഉറങ്ങിയിരുന്ന അതേ മുറിയിലായിരുന്നു മകനുമെന്ന് അദ്ദേഹം പറയുന്നു. കെട്ടിടത്തില്‍ തീപിടിത്തമുണ്ടായെന്ന് അറിഞ്ഞപ്പോഴും എബ്രഹാമിന് പ്രതീക്ഷയുണ്ടായിരുന്നു എന്നാല്‍ മറിച്ചായിരുന്നു വിധി. ആശ്വസിപ്പിക്കാനെത്തുന്ന ബന്ധുക്കളോട് വിഷമം ഉള്ളിലൊതുക്കി മറുപടി പറയുകയാണ് എബ്രഹാം.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
