പുതുവർഷം സിനിമാ പ്രേമികൾക്ക് ആഘോഷമാക്കാം; ജനുവരിയിൽ റിലീസാകുന്ന പ്രധാന ചിത്രങ്ങൾ ഇവയൊക്കെയാണ്

2024 ന്‍റെ ആദ്യ പകുതി മലയാളം സിനിമാ പ്രേക്ഷകർ ആസ്വദിച്ചത് പോലെ ഇന്ത്യൻ സിനിമാ ഇൻഡസ്ട്രിയിൽ മറ്റൊരു പ്രേക്ഷകർക്കും ആസ്വദിക്കാൻ ഭാഗ്യം ഉണ്ടായിട്ടില്ല. പ്രേമലു, ഭ്രമയുഗം, മഞ്ഞുമ്മൽ ബോയ്സ്, മലയ്‌ക്കോട്ടെ വാലിബൻ, അന്വേഷിപ്പിൻ കണ്ടെത്തും, ആട് ജീവിതം തുടങ്ങി പാൻ ഇന്ത്യ തലത്തിൽ ശ്രദ്ധിക്കപ്പെട്ടതും ബോക്സ് ഓഫിസിൽ കോടികൾ വാരിക്കൂട്ടിയതുമായ മലയാള സിനിമകൾ ഏറെയാണ്.

വരാനിരിക്കുന്ന 2025 ലും ഇങ്ങനെ അടിപൊളി സിനിമകൾ റിലീസിനെത്തുമോ എന്ന് കാത്തിരിക്കുന്ന മലയാളി സിനിമാ പ്രേമികൾക്ക് സന്തോഷ വാർത്ത. ജനുവരിയിൽ തന്നെ സൂപ്പർ താരങ്ങളുടെയടക്കം പ്രേക്ഷകർ കാത്തിരിക്കുന്ന നിരവധി സിനിമകളാണ് എത്തുന്നത്.

also read; പുഷ്പ 2 നാളെയെത്തുന്നു; കേരളത്തില്‍ മണിക്കൂറുകള്‍ക്കകം രണ്ട് കോടിയിലേറെ പ്രീ സെയില്‍സ്

മമ്മൂക്കയുടെ ‘ഡൊമിനിക് ആൻഡ് ദ ലേഡീസ് പേഴ്സ്’, ബേസിൽ ജോസഫ്, സൗബിൻ ഷാഹിർ പ്രധാന കഥാപാത്രങ്ങളെ അവതരിപ്പിക്കുന്ന ‘പ്രാവിൻകൂട് ഷാപ്പ്’, ടൊവിനോയുടെ ‘ഐഡന്‍റിറ്റി’, മോഹൻലാലിനെ നായകനാക്കി തരുൺ മൂർത്തി സംവിധാനം ചെയ്യുന്ന ചിത്രം ‘തുടരും’ എന്നിവയാണ് ജനുവരിയിൽ ബിഗ് സ്ക്രീനുകളിലെത്തുന്ന പ്രധാന ചിത്രങ്ങൾ.

ഡൊമിനിക് ആൻഡ് ദ ലേഡീസ് പേഴ്സ് – ഗൗതം വാസുദേവ മേനോൻ മലയാളത്തിൽ ആദ്യമായി സംവിധാനം ചെയ്യുന്ന ചിത്രമാണ് ‘ഡൊമിനിക് ആൻഡ് ദ ലേഡീസ് പഴ്സ്’. ഡോക്ടർ സൂരജ് രാജൻ, ഡോക്ടർ നീരജ് രാജൻ എന്നിവർ ചേർന്നാണ് ചിത്രത്തിൻ്റെ തിരക്കഥയൊരുക്കിയിരിക്കുന്നത്. ചിത്രം മമ്മൂട്ടി കമ്പനി തന്നെയാണ് നിർമിച്ചിരിക്കുന്നത്. മമ്മൂട്ടിയെ കൂടാതെ വിനീത്, ഗോകുൽ സുരേഷ്, ലെന, സിദ്ദിഖ്, വിജി വെങ്കടേഷ്, വിജയ് ബാബു എന്നിവരാണ് ചിത്രത്തിലെ മറ്റു പ്രധാന താരങ്ങൾ. ചിത്രത്തിന്‍റെ ടീസർ ഇന്ന് വൈകുന്നേരം 7 മണിയോടെ പുറത്തിറങ്ങും. ജനുവരി രണ്ടാം വാരത്തിലാകും റിലീസ്.

also read; നസ്രിയയുടെ അനുജനും നടനുമായ നവീന്‍ നസീമിന്റെ വിവാഹ നിശ്ചയം കഴിഞ്ഞു; ചടങ്ങില്‍ താരമായി ഫഹദ്

തുടരും – മോഹൻലാലിനെ നായകനാക്കി തരുൺ മൂർത്തി സംവിധാനം ചെയ്യുന്ന ചിത്രമാണ് ‘തുടരും’. മലയാളത്തിന്‍റെ എവർഗ്രീൻ കോംബോയായ മോഹൻലാൽ-ശോഭന താരജോഡികൾ 20 വർഷങ്ങൾക്ക് ശേഷം ഒന്നിക്കുന്ന ചിത്രം കൂടിയാണ് ‘തുടരും’. രജപുത്ര വിഷ്വല്‍ മീഡിയയുടെ ബാനറില്‍ എം രഞ്ജിത്താണ് ചിത്രം നിര്‍മിക്കുന്നത്. കെആര്‍ സുനിലും തരുണ്‍ മൂര്‍ത്തിയും ചേര്‍ന്നാണ് തിരക്കഥ ഒരുക്കുന്നത്. ഷാജി കുമാറാണ് ഛായാഗ്രഹണം. നിഷാദ് യൂസുഫ്, ഷെഫീഖ് വിബി എന്നിവര്‍ ചേര്‍ന്നാണ് എഡിറ്റിങ് നിര്‍വഹിക്കുന്നത്. ജേക്‌സ് ബിജോയ് സംഗീത സംവിധാനം നിര്‍വഹിക്കുന്നു. ജനുവരി 30 നാവും ചിത്രം തിയറ്ററുകളിലെത്തുക.

പ്രാവിൻകൂട് ഷാപ്പ് – നവാഗതനായ ശ്രീരാജ് ശ്രീനിവാസൻ ആണ് പ്രാവിൻ കൂട് ഷാപ്പ് സംവിധാനം ചെയ്യുന്നത്. ഷാഹിർ, ബേസിൽ ജോസ‌ഫ് എന്നിവർ പ്രധാന വേഷത്തിൽ എത്തുന്ന ചിത്രത്തിൽ ചെമ്പൻ വിനോദും പ്രധാന വേഷത്തിൽ എത്തുന്നുണ്ട്. അൻവർ റഷീദ് എന്റര്‍ടൈന്‍മെന്റിന്റെ ബാനറിൽ അൻവർ റഷീദ് നിർമ്മിക്കുന്ന ചിത്രം കൂടിയാണ് പ്രാവിൻ കൂട് ഷാപ്പ്. ‘മഞ്ഞുമ്മൽ ബോയ്‌സി’ന്റെ വൻ വലിയ വിജയത്തിനു ശേഷ൦ ഷൈജു ഖാലിദ് ഛായാഗ്രഹണം നിർവഹിക്കുന്ന ചിത്രം കൂടിയാണിത്. ഡാര്‍ക്ക്‌ ഹ്യൂമര്‍ ശൈലിയിൽ ഒരുക്കുന്ന ഈ ചിത്രത്തിനു വേണ്ടി തല്ലുമാല, ഫാലിമി, പ്രേമലു എന്നീ ചിത്രങ്ങളിലൂടെ ഏറേ ശ്രദ്ധേയനായ വിഷ്ണു വിജയ്‌ സംഗീതം ഒരുക്കുന്നു.

also read; ഇത് മുഴുവനായും എൻ്റെ സിനിമ, മമ്മൂട്ടി-മോഹൻലാൽ ചിത്രത്തിൻ്റെ തിരക്കഥ കമൽഹാസൻ്റേതല്ല; മഹേഷ് നാരായണൻ

ഐഡന്‍റിറ്റി – ‘ഫോറൻസിക്’ സിനിമയൊരുക്കിയ അഖില്‍ പോളും അനസ് ഖാനും ചേര്‍ന്നാണ് സിനിമയുടെ സംവിധാനം ഒരുക്കിയിരിക്കുന്നത്. തെന്നിന്ത്യന്‍ സൂപ്പർ നായിക തൃഷ കൃഷ്‌ണന്‍ ആണ് ചിത്രത്തില്‍ ടൊവിനോയുടെ നായികയായി എത്തുന്നത്. ടൊവിനോ തോമസിന്‍റെയും തൃഷയുടെയും ആക്ഷന്‍ രംഗങ്ങളാണ് ‘ഐഡന്‍റിറ്റി’യുടെ ഹൈലൈറ്റ് എന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു. മഡോണ സെബാസ്റ്റ്യനും സിനിമയില്‍ പ്രധാന വേഷത്തില്‍ എത്തുന്നുണ്ട്. രാഗം മൂവീസിന്‍റെ ബാനറില്‍ രാജു മല്യത്ത്, സെഞ്ച്വറി കൊച്ചുമോന്‍ എന്നിവര്‍ ചേര്‍ന്നാണ് സിനിമയുടെ നിര്‍മാണം.