തസ്തിക നിര്‍ണയം പൂര്‍ത്തിയാകുമ്പോള്‍ അധ്യാപകര്‍ക്ക് തൊഴില്‍ നഷ്ടം ഉണ്ടാകുമെന്ന പ്രചാരണം വാസ്തവ വിരുദ്ധമാണെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവന്‍കുട്ടി. അധ്യാപക തസ്തിക നിര്‍ണയം നടത്തുന്നത് കെ ഇ ആര്‍ ചട്ടങ്ങള്‍ക്കും വ്യവസ്ഥകള്‍ക്കും അനുഗുണമായാണ്. എല്ലാ കാലത്തും കുട്ടികളുടെ എണ്ണത്തിലെ ഏറ്റക്കുറച്ചില്‍ അനുസരിച്ച് അധ്യാപക തസ്തികാ നിര്‍ണയത്തിലും പ്രതിഫലനം ഉണ്ടാവാറുണ്ട്. ഊഹത്തിന്റെ അടിസ്ഥാനത്തില്‍ ആണ് ഇപ്പോള്‍ തസ്തിക നഷ്ടപ്പെടും എന്ന് പറയുന്നത്.
2024-25 വര്‍ഷത്തെ തസ്തിക നിര്‍ണ്ണയം പൂര്‍ത്തികരിക്കുന്നതിന് 26/09/24 ലെ സര്‍ക്കാര്‍ ഉത്തരവ് പ്രകാരം 31/10/2024 വരെ സമയം അനുവദിച്ചിട്ടുണ്ട്. നാളിതുവരെ സമന്വയ പോര്‍ട്ടല്‍ മുഖേന തസ്തിക നിര്‍ണ്ണയം പൂര്‍ത്തീകരിച്ച സ്‌കൂളുകളില്‍ 3211 തസ്തികകള്‍ കുറവു വന്നതായി പോര്‍ട്ടലില്‍ കാണുന്നുണ്ട്. ഇതില്‍ ഗവണ്‍മെന്റ് സ്‌കൂളുകളില്‍ 1410 തസ്തികയും എയ്ഡഡ് സ്‌കൂളില്‍ 1801 തസ്തികകളും ഉള്‍പ്പെടുന്നു.
എന്നാല്‍ ഈ വര്‍ഷം തന്നെ 1799 സ്‌കൂളുകളില്‍ നിന്നായി 3892 അധിക തസ്തിക പ്രൊപ്പോസല്‍ ലഭിച്ചിട്ടുണ്ട്. ഇവ ഉന്നത പരിശോധനക്കായി ഡിഇഒ/ഡിഡിഇ എന്നിവര്‍ക്ക് നല്‍കിയിരിക്കുകയാണ്. പരിശോധന പൂര്‍ത്തികരിച്ച് പ്രൊപ്പോസലുകള്‍ ലഭിച്ചാല്‍ മാത്രമേ തസ്തികകളുടെ എണ്ണം കൃത്യമായി കണക്കാക്കാന്‍ കഴിയുകയുളളൂ എന്നും മന്ത്രി വി ശിവന്‍കുട്ടി ചൂണ്ടിക്കാട്ടി.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
