കാലം കടന്ന് നിത്യതയിലേക്ക്… സാഹിത്യകുലപതിക്ക് വിട

അ​ഗ്നിയിലലിഞ്ഞ് കാലത്തിന്റെ വിഹായസ്സിലേക്ക് എംടി യാത്രയായി. കോഴിക്കോട് മാവൂർ റോഡിലുള്ള സ്മൃതിപഥത്തിൽ മലയാളത്തിന്റെ പ്രിയ സാഹിത്യകാരന്റെ ഭൗതികശരീരം സംസ്കരിച്ചു. സംസ്ഥാനത്ത് ഇന്നും നാളേയും ​ദുഃഖാചരണം. കാലത്തെയും ലോകത്തെയും പ്രപഞ്ചത്തെയും കഥകളായി കൈവള്ളയിലിട്ട് അമ്മാനമാടിയ മലയാള സാഹിത്യത്തിലെ അതികായൻ എം ടി വാസുദേവൻ നായർ വിടവാങ്ങുമ്പോൾ, ബാക്കിയാക്കുന്നത് അദ്ദേഹത്തിന്റെ അനശ്വരമായ ഒട്ടനവധി സർ​ഗസൃഷ്ടികളാണ്.

ഭാരതപ്പുഴ തെക്കുവടക്കായി ഒഴുകുന്ന കൂട്ടക്കടവില്‍ നിന്ന് വയലും കുരുതിപ്പറമ്പും കഴിഞ്ഞ് മാടത്ത് തെക്കേപ്പാട്ട് തറവാട്ടിലേക്ക് ഒതുക്കു കല്ലുകള്‍ കയറിവന്ന കഥകളും കഥാപാത്രങ്ങളും മലയാളസാഹിത്യത്തിന്റെ ഒന്നിത്യങ്ങളിൽ എംടി എന്ന പേര് അനശ്വരമാക്കി ഇനിയും തലമുറകളോളം നിലനില‍ക്കും.

ALSO READ; ‘എംടിയെന്ന കാലം’- മുഖ്യമന്ത്രി പിണറായി വിജയൻ എ‍ഴുതുന്നു…

കാലത്തിനതീതനായി മലയാളത്തിന്റെ സുകൃതമായ എഴുത്തുകാരൻ അക്ഷരങ്ങളിലൂടെ ക്ഷരമില്ലാത്തവനായി കാലാതിവർത്തിയായി എന്നും മലയാളിമനസ്സിൽ നിലനിൽക്കും. കാലം കുത്തിയൊഴുകുമ്പോഴും നക്ഷത്രങ്ങള്‍ പോലെ പരിശോഭിക്കുന്ന കഥാപ്രപഞ്ചത്തിനും വിരാമമിട്ടുകൊണ്ടാണ് എംടിയെന്ന മഹാപ്രതിഭ വിടവാങ്ങുന്നത്. എന്നാലും മരണം എന്ന മൂന്നക്ഷരത്തെ കാലം എന്ന രണ്ടക്ഷരം കൊണ്ട് അതിജീവിച്ച് കാലാതീതനായി എന്നും നിലകൊള്ളുന്ന എഴുത്തുകാരന്, സാഹിത്യത്തിന്റെ വിശാലമായ വാതായനങ്ങൾ തുറന്നുതന്ന മഹാപ്രതിഭക്ക് നന്ദി.വാർധക്യസഹജമായ അസുഖങ്ങളെത്തുടർന്ന് കോഴിക്കോട് സ്വകാര്യ ആശുപത്രിയിൽ ചികിത്സയിലായിരുന്ന എം ടി വാസുദേവൻ നായർ (91) ക‍ഴിഞ്ഞദിവസം രാത്രി പത്ത് മണിയോടെയായിരുന്നു വിടപറഞ്ഞത്.

1933 ജൂലായ് 15-ന് പൊന്നാനി താലൂക്കിലെ കൂടല്ലൂരിൽ ടി നാരായണന്‍ നായരുടെയും അമ്മാളു അമ്മയുടെയും നാല് ആണ്‍മക്കളില്‍ ഇളയ മകനായിട്ടാണ് മാടത്ത് തെക്കേപ്പാട്ട് വാസുദേവന്‍ നായരെന്ന എംടിയുടെ ജനനം. മലമക്കാവ് എലിമെന്ററി സ്‌കൂള്‍, കുമരനെല്ലൂര്‍ ഹൈസ്‌കൂള്‍ എന്നിവിടങ്ങളിലെ പ്രാഥമിക വിദ്യാഭ്യാസത്തിനുശേഷം പാലക്കാട് വിക്ടോറിയ കോളേജില്‍നിന്ന് 1953-ല്‍ രസതന്ത്രത്തില്‍ ബിരുദം നേടി. കോളേജ് വിദ്യാഭ്യാസത്തിന് ശേഷം സ്‌കൂള്‍ അധ്യാപകനായി. സ്‌കൂള്‍ കാലംമുതല്‍ എ‍ഴുത്തിന്‍റെ ലോകത്തേക്ക് പേന ചലിപ്പിച്ചു തുടങ്ങി. എംടിയുടെ ആദ്യകഥ വിക്ടോറിയ പഠനകാലത്ത് പ്രസിദ്ധീകരിച്ച ‘രക്തം പുരണ്ട മണ്‍തരികള്‍ ആയിരുന്നു. 1958-ല്‍ പ്രസിദ്ധീകരിച്ച ‘നാലുകെട്ട്’ ആണ് ആദ്യം പുസ്തകരൂപത്തില്‍ പ്രസിദ്ധീകരിച്ചത്. 1959-ലെ കേരള സാഹിത്യ അക്കാദമി പുരസ്‌കാരം ഇത് നേടി. മലയാള സാഹിത്യത്തിൽ കഥകളുടെ പെരുന്തച്ചന്‍റെ യാത്രകൾക്ക് പ്രൗഢമായ തുടക്കം.

ALSO READ; എംടിയുടെ വിയോഗത്തില്‍ അനുശോചിച്ച് രാഷ്ട്രപതി

കേന്ദ്ര സാഹിത്യ അക്കാദമി അവാര്‍ഡ് നേടിയ കാലം (1969), വയലാര്‍ അവാര്‍ഡ് നേടിയ രണ്ടാമൂഴം (1984) , എൻപി മുഹമ്മദും ചേർന്ന് എഴുതിയ അറബിപ്പൊന്ന് (1960), അസുരവിത്ത് (1962), മഞ്ഞ് (1964), വിലാപയാത്ര (1978), വാരാണസി (2002) എന്നിവയാണ് പ്രധാന കൃതികൾ. ഓടക്കുഴല്‍ അവാര്‍ഡ് നേടിയ വാനപ്രസ്ഥം, രക്തം പുരണ്ട മണ്‍ത്തരികള്‍, വെയിലും നിലാവും , വേദനയുടെ പൂക്കൾ, നിന്റെ ഓര്‍മയ്ക്ക്, ഓളവും തീരവും, ഇരുട്ടിന്റെ ആത്മാവ്, കുട്ട്യേടത്തി, നഷ്ടപ്പെട്ട ദിനങ്ങള്‍, ബന്ധനം, പതനം, കളിവീട്, ഡാർ എസ് സലാം, അജ്ഞാതന്റെ ഉയരാത്ത സ്മാരകം, അഭയം തേടി വീണ്ടും, സ്വര്‍ഗം തുറക്കുന്ന സമയം, ഷെര്‍ലക് തുടങ്ങി നിരവധി കഥകളും എംടിയുടെ തൂലികയില്‍ പിറന്നു. മലയാളസാഹിത്യത്തിനു നൽകിയ അമൂല്യ സംഭാവനകൾ കണക്കിലെടുത്ത് 1996-ൽ കാലിക്കറ്റ് സർവ്വകലാശാല ബഹുമാനസൂചകമായി ഡി.ലിറ്റ്. ബിരുദം നൽകി ആദരിച്ചു. 1995-ലെ ജ്ഞാനപീഠ പുരസ്കാരം അദ്ദേഹത്തിനു ലഭിച്ചു. 2005-ൽ പത്മഭൂഷൺ നൽകി എംടിയിലെ പ്രതിഭയെ ഭാരതസർക്കാർ ആദരിക്കുകയുണ്ടായി.

മലയാള സിനിമയിലും അമൂല്യമായ സംഭാവനകൾ നൽകിയ വ്യക്തിത്വമായിരുന്നു എംടി. 1963-64 കാലത്ത് സ്വന്തം കഥയായ ‘മുറപ്പെണ്ണ്’ തിരക്കഥയെഴുതി എംടി ചലച്ചിത്രലോകത്തു പ്രവേശിച്ചു. 1973-ൽ ആദ്യമായി സംവിധാനം ചെയ്ത് നിർമ്മിച്ച ‘നിർമാല്യം’ എന്ന ചിത്രത്തിന് രാഷ്ട്രപതിയുടെ സ്വർണ്ണപ്പതക്കം ലഭിച്ചു. അമ്പതിലേറെ തിരക്കഥകളെഴുതിയിട്ടുള്ള അദ്ദേഹത്തിന് നാലുതവണ ഈ മേഖലയിൽ ദേശീയപുരസ്കാരം ലഭിച്ചു. കടവ്‌, ഒരു വടക്കൻ വീരഗാഥ, സദയം, പരിണയം തുടങ്ങിയ ചിത്രങ്ങൾക്കും ദേശീയപുരസ്കാരം ലഭിച്ചു.

ഒരു മാസത്തിനിടെ ഒന്നിലധികം തവണ എംടിയെ ആശുപത്രിയിൽ പ്രവേശിപ്പിച്ചിരുന്നു. ഹൃദ്രോഗവും ശ്വാസതടസവും അനുഭവപ്പെട്ടതിനെ തുടർന്നാണ് 11 ദിവസമായി അദ്ദേഹം ആശുപത്രിയിൽ കഴിയുകയായിരുന്നു. ആരോഗ്യ നില ഗുരുതരമാണെന്നും ഹൃദയസ്തംഭനം ഉണ്ടായെന്നും അറിയിച്ചുകൊണ്ട് കഴിഞ്ഞ ദിവസം രാവിലെ മെഡിക്കല്‍ ബുള്ളറ്റിനും ആശുപത്രി അധികൃതര്‍ പുറത്തിറക്കിയിരുന്നു. ഭാര്യ: കലാമണ്ഡലം സരസ്വതി. മക്കൾ: സിതാര, അശ്വതി.