വയനാട്‌ ഡിസിസി ട്രഷറർ എൻ എം വിജയന്റെ മരണത്തിൽ ആത്മഹത്യാ പ്രേരണാക്കേസിൽ പ്രതികളായ ഐ സി ബാലകൃഷ്ണൻ എംഎൽഎയ്‌ക്കും ഡിസിസി പ്രസിഡന്റ്‌ എൻ ഡി അപ്പച്ചനും കർശന ഉപാധികളോടെ മുൻകൂർ ജാമ്യം. കൽപ്പറ്റ ജില്ലാ പ്രിൻസിപ്പൽ ആൻഡ്‌ സെഷൻസ്‌ കോടതിയാണ്‌ മുൻകൂർ ജാമ്യഹർജിയിൽ വിധി പറഞ്ഞത്‌. പ്രതികളെ സമയബന്ധിത കസ്റ്റഡിയിലെടുത്ത്‌ കൂടുതൽ ചോദ്യംചെയ്യാമെന്ന് ഉത്തരവിൽ പറയുന്നു.
ഡിഡിസി ട്രഷററെയും മകനെയും ആത്മഹത്യയിലേക്ക്‌ നയിച്ച കേസിൽ എംഎൽഎ ഒന്നാം പ്രതിയും ഡിസിസി പ്രസിഡന്റ്‌ രണ്ടാം പ്രതിയുമാണ്‌. മൂന്നാം പ്രതിയായ മുൻകോൺഗ്രസ്‌ നേതാവ്‌ കെ കെ ഗോപിനാഥനും ഉപാധികളോടെ മുൻകൂർ ജാമ്യം ലഭിച്ചു.മുൻകൂർ ജാമ്യം അനുവദിച്ചെങ്കിലും കസ്റ്റഡിയ്ക്ക്‌ തുല്യമായി പ്രതികളെ ചോദ്യംചെയ്യും.
Also Read: എൻ എം വിജയൻ ആത്മഹത്യാ പ്രേരണക്കേസ് കോൺഗ്രസ് നേതാക്കൾക്ക് കർശനമായ ഉപാധികളോടെ മുൻകൂർ ജാമ്യം
തിങ്കൾ മുതൽ ശനിവരെയുള്ള ദിവസങ്ങളിൽ മൂന്നു ദിവസം സമയ ബന്ധിത കസ്റ്റഡിപ്രകാരം ഐ സി ബാലകൃഷ്ണൻ എംഎൽഎ അന്വേഷണ ഉദ്യോഗസ്ഥനു മുമ്പിൽ ചോദ്യം ചെയ്യലിന്‌ വിധേയനാകണം. ഡിസിസി പ്രസിഡന്റ്‌ എൻ ഡി അപ്പച്ചനും കെ കെ ഗോപിനാഥനും തിങ്കൾ മുതൽ ബുധൻ വരെ സമയബന്ധിത കസ്റ്റഡിക്കും ചോദ്യംചെയ്യലിനും വിധേയരാകണം. രാവിലെ പത്തു മുതൽ വൈകിട്ട്‌ അഞ്ചുവരെ മൂവർക്കും സമയബന്ധിത കസ്റ്റഡി.
കോൺഗ്രസ് ഓഫീസുകളിൽ നിന്നും അന്വേഷകസംഘത്തിന്‌ തെളിവുകൾ ശേഖരിക്കുന്നതിന്‌ സൗകര്യം ഒരുക്കണമെന്നും വ്യവസ്ഥയുണ്ട്‌. ഏഴു ഉപാധികളോടെയാണ്‌ കോടതി മുൻകൂർജാമ്യം അനുവദിച്ചിരിക്കുന്നത്.
ബത്തേരി ഡിവൈഎസ്‌പി അബ്ദുൾ ഷരീഫിന്റെ നേതൃത്വത്തിലുള്ള പ്രത്യേക സംഘം അന്വേഷിച്ചിരുന്ന കേസ് ബുധനാഴ്‌ച ക്രൈംബ്രാഞ്ചിന്‌ കൈമാറിയിരുന്നു. പൊലീസ്‌ അന്വേഷണത്തിൽ എംഎൽഎക്കും ഡിസിസി പ്രസിഡന്റിനും എതിരെ ശക്തമായ മൊഴികളും തെളിവുകളുമുണ്ട്‌. നിയമനക്കോഴയിൽ വിജിലൻസിന്റെ അന്വേഷണവും പുരോഗമിക്കുകയാണ്‌. വരും ദിവസങ്ങളിൽ വിജിലൻസ്‌ നിയമനക്കോഴ കേസിൽ ഐ സി ബാലകൃഷ്ണൻ ഉൾപ്പെടെയുള്ളവരെ ചോദ്യം ചെയ്തേക്കും.
അതേസമയം, കേസ് വന്നപ്പോൾ താൻ ഒളിവിൽ പോയതല്ലെന്നും തീർഥാടനത്തിലായിരുന്നു എന്നുമാണ് ഐ സി ബാലകൃഷ്ണൻ മാധ്യമങ്ങളോട് പ്രതികരിച്ചത്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
