ജൂലൈ 3 മുതൽ ഏകീകൃത കുർബാന അർപ്പിക്കാത്ത വൈദികരെ സഭയ്ക്ക് പുറത്താക്കുമെന്ന സർക്കുലറിൽ വിമത വിഭാഗം പ്രതിഷേധം കടുപ്പിക്കുകയാണ്. ജൂൺ 16 ന് എറണാകുളം അങ്കമാലി അതിരൂപതയിലെ പള്ളികളിൽ സർക്കുലർ വായിക്കാൻ നിർദേശമുണ്ടെങ്കിലും ഒരു പള്ളികളിലും സർക്കുലർ വായിക്കില്ല എന്ന നിലപാടിലാണ് വിമതവിഭാഗം. മാത്രമല്ല ഏതെങ്കിലും വൈദികൻ സർക്കുലർ വായിക്കാൻ ശ്രമിച്ചാൽ ശക്തമായി എതിർക്കാനുമാണ് തീരുമാനം.’ സർക്കുലർ കൊടും ചതിയുടെ ഭാഗമാണെന്നും ജനാഭിമുഖ കുർബാന തുടരുമെന്നും വിമതവിഭാഗം വൈദികർ പറഞ്ഞു.
അതേസമയം പ്രതിഷേധ സൂചകമായി എറണാകുളം ബിഷപ്പ് ഹൗസിനു മുന്നിൽ വിമതവിഭാഗം സർക്കുലർ കത്തിച്ചു. സീറോ മലബാർ സഭ ആർച്ച് ബിഷപ് മാർ റാഫൽ തട്ടിലും എറണാകുളം അങ്കമാലി അതിരൂപത അപ്പോസ്തലിക് അഡ്മിനിസ്ട്രേറ്റർ മാർ ബോസ്കോ പുത്തൂരും സംയുക്തമായാണ് സർക്കുലർ പുറപ്പെടുവിച്ചിരിക്കുന്നത്. ഏകീകൃത കുർബാന അർപ്പിക്കുമെന്ന് ജൂലൈ മൂന്നിന് മുൻപ് സത്യവാങ്മൂലം നൽകണമെന്നും അറിയിച്ചിട്ടുണ്ട്. എന്നാൽ സർക്കുലർ അംഗീകരിക്കില്ലെന്ന് നിലപാടെടുത്ത വിമതവിഭാഗം പ്രതിഷേധം ശക്തമാക്കാനും തീരുമാനിച്ചു.
എറണാകുളം-അങ്കമാലി അതിരൂപതയിൽ ഏകീകൃത കുർബാന നടപ്പാക്കുന്നതിൽ വീണ്ടും പ്രതിഷേധം. സീറോ മലബാർ സഭയുടെ സർക്കുലർ തള്ളിയ വിമത വിഭാഗം ജനാഭിമുഖ കുർബാന തുടരുമെന്ന നിലപാടിലാണ്. അതേസമയം ഈ മാസം 14 ന് ചേരുന്ന സിനഡിലെ തീരുമാനം നിർണായകമാകും.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
