സുരേഷ് ഗോപി കൂടെ അടങ്ങുന്ന സമൂഹത്തിനെതിരെയാണ് ഹേമ കമ്മിറ്റി റിപ്പോർട്ടിന്റെ ആരോപണമെന്ന് സാറ ജോസഫ്. ആരോപണത്തിൽ ഉൾപ്പെട്ടിട്ടില്ലെങ്കിൽ സുരേഷ് ഗോപി വിഷയത്തിൽ പ്രതികരിക്കണം. റിപ്പോർട്ടിൽ വിശദാംശങ്ങൾ ഒന്നുമില്ല. ഒരു പുകമറ മാത്രമാണുള്ളത്. കുറ്റകൃത്യങ്ങൾ നടന്നിട്ടുണ്ട്. ക്രൈം നടക്കുമ്പോൾ അതിൽ പ്രതികൾ വേണം. പക്ഷേ റിപ്പോർട്ടിൽ പ്രതികളുടെ പേരുകൾ ഇല്ല. പ്രതികളുടെ പേരുകൾ ഉണ്ടെങ്കിൽ മാത്രമേ സർക്കാരിന് ഉൾപ്പെടെ നടപടി സ്വീകരിക്കാൻ കഴിയൂ. മുൻപും ഇതുപോലെ നടന്നിട്ടുണ്ട് എന്ന കാര്യം ആർക്കും ഊഹിക്കാവുന്നതാണ്.
മാഫിയയുടെ കയ്യിലാണ് ഈ രംഗം ഉള്ളത് എന്നതിനാൽ അത് ചൂണ്ടിക്കാണിക്കണം. പേരുകൾ ഉണ്ടെങ്കിലേ പൊലീസിനും സർക്കാരിനും ഇടപെടാൻ കഴിയൂ. പൊതുജനങ്ങൾക്ക് കിട്ടിയ റിപ്പോർട്ട് അപൂർണ്ണമാണ്‌. നടിയെ ആക്രമിച്ച കേസിൽ വിചാരണ നടക്കുന്നുണ്ട്. സമാനമായ കുറ്റകൃത്യമാണ് റിപ്പോർട്ടിൽ. ആരു ചെയ്തു എന്തു ചെയ്തു എന്ന് പരാമർശിക്കാതെയുള്ള റിപ്പോർട്ടിന് പ്രസക്തിയില്ല. റിപ്പോർട്ട് പൂർണമായും പുറത്തുവിടാത്തതിലൂടെ കുറ്റം ചെയ്തയാളെ സംരക്ഷിക്കുകയാണ് ചെയ്യുന്നത്.
പുരുഷാധിപത്യ സമൂഹം ആണ് നമ്മുടേതെന്ന് വീണ്ടും തെളിയിക്കപ്പെടുകയാണ്. ഡബ്ലിയു സി സിക്ക് ആവശ്യമായ പിന്തുണ പൊതു സമൂഹത്തിൻറെ ഭാഗത്തുനിന്നും മറ്റ് സംഘടനകളുടെ ഭാഗത്തുനിന്നും കിട്ടിയില്ല. ഡബ്ല്യുസിസിയിൽ അംഗങ്ങളായവരെ ഒറ്റതിരിഞ്ഞ് ആക്രമിച്ചു. അവർക്ക് അവസരങ്ങൾ പോലും നിഷേധിക്കപ്പെട്ടു. ഇത്തരത്തിലുള്ള ഒരു റിപ്പോർട്ട് പുറത്ത് വന്നത് ഡബ്ല്യുസിസിയുടെ കൂടി വിജയമാണ്. പൂർണ്ണ വിജയമാകണമെങ്കിൽ കുറ്റകൃത്യം കോടതിക്ക് മുൻപാകെ വരണമെന്നും സാറ ജോസഫ് പറഞ്ഞു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
