‘സോഷ്യലിസത്തിനും ബഹുജന വിമോചനത്തിനും വേണ്ടി അചഞ്ചല പ്രതിബദ്ധത പുലർത്തിയ നേതാവ്; സഖാവ് സീതാറാം യെച്ചൂരിക്ക് അന്ത്യാഭിവാദ്യം’- വിജൂ കൃഷ്ണൻ എഴുതുന്നു

വിജൂ കൃഷ്ണൻ

കമ്മ്യൂണിസ്റ്റ് പാർട്ടി ഓഫ് ഇന്ത്യയുടെ (മാർക്സിസ്റ്റ്) ജനറൽ സെക്രട്ടറി സഖാവ് സീതാറാം യെച്ചൂരി രാജ്യത്തെ ഇടതുപക്ഷത്തിൻ്റെ അനിഷേധ്യനായ നേതാവാണ്. കഴിഞ്ഞ ദശകത്തിൽ കോർപ്പറേറ്റ്-വർഗീയ, സ്വേച്ഛാധിപത്യ ഭരണകൂടത്തിൻ്റെ ഏറ്റവും ശക്തമായി എതിർത്തവരിൽ ഒരാളാണ്. 1974-ൽ സ്റ്റുഡൻ്റ്‌സ് ഫെഡറേഷൻ ഓഫ് ഇന്ത്യയിൽ വിദ്യാർത്ഥി പ്രസ്ഥാനത്തിലൂടെ രാഷ്ട്രീയ പ്രവർത്തനം ആരംഭിച്ച അദ്ദേഹത്തിൻ്റെ ജീവിതത്തിൻ്റെ തുടർന്നുള്ള അഞ്ച് പതിറ്റാണ്ടുകൾ സോഷ്യലിസത്തിനും ബഹുജന വിമോചനത്തിനും വേണ്ടിയുള്ള മായാത്ത പ്രതിബദ്ധതയായിരുന്നു.

1970കളിൽ അടിയന്തരാവസ്ഥയുടെ പ്രക്ഷുബ്ധമായ കാലത്താണ് യെച്ചൂരിയുടെ രാഷ്ട്രീയ ആശയങ്ങൾക്ക് മൂർച്ച കൂട്ടിയത്. വിയറ്റ്നാമിൽ യുഎസ് സാമ്രാജ്യത്വത്തിൻ്റെ നാണംകെട്ട പരാജയം, പൊതു സാമ്രാജ്യത്വ വിരുദ്ധചേരിയുടെ മുന്നേറ്റം. ചിലിയിലെ ചെറുത്തുനിൽപ്പുകളോടുള്ള അന്താരാഷ്ട്ര ഐക്യദാർഢ്യം, പലസ്തീൻ വിമോചന പ്രസ്ഥാനം, വർണ്ണവിവേചന വിരുദ്ധ പ്രസ്ഥാനം, ക്യൂബൻ ജനതയുടെ വീരോചിതമായ ചെറുത്തുനിൽപ്പ് എന്നിവയെല്ലാം യെച്ചൂരിയെ പ്രചോദിപ്പിച്ചുവെന്നതിൽ സംശയമില്ല. ഇന്ദിരാഗാന്ധിയുടെ നേതൃത്വത്തിലുള്ള കോൺഗ്രസ് സർക്കാർ ഏർപ്പെടുത്തിയ സ്വേച്ഛാധിപത്യ അടിയന്തരാവസ്ഥയിൽ അദ്ദേഹം ഒളിവിൽ പോയി ചെറുത്തുനിൽപ്പ് സംഘടിപ്പിക്കുകയും ഒടുവിൽ 1975-ൽ അറസ്റ്റിലാവുകയും ചെയ്തു. അടിയന്തരാവസ്ഥയ്ക്ക് ശേഷം 1977 മുതൽ മൂന്ന് തവണ ജെഎൻയു വിദ്യാർത്ഥി യൂണിയൻ്റെ പ്രസിഡൻ്റായി അദ്ദേഹം തിരഞ്ഞെടുക്കപ്പെട്ടു. 1984-86ൽ എസ്എഫ്ഐയുടെ അഖിലേന്ത്യാ പ്രസിഡൻ്റായി. 1984-ൽ 32-ാം വയസിൽ സി.പി.ഐ.എമ്മിൻ്റെ കേന്ദ്രകമ്മിറ്റിയിലും അടുത്ത വർഷം പുതുതായി രൂപീകരിച്ച സെൻട്രൽ സെക്രട്ടേറിയറ്റിലും അദ്ദേഹത്തെ ഉൾപ്പെടുത്തി. 1992ൽ പതിനാലാം പാർട്ടി കോൺഗ്രസിൽ പൊളിറ്റ്ബ്യൂറോയിലേക്ക് തിരഞ്ഞെടുക്കപ്പെട്ടു.

Also Read- അടിയന്തരാവസ്ഥ വാർത്തെടുത്ത കമ്മ്യൂണിസ്റ്റ്; സമരതീക്ഷ്ണമായ ജെഎൻയു നാളുകൾ

സോഷ്യലിസത്തിൻ്റെ ഭാവിയെക്കുറിച്ച് ലോകം തീവ്രമായ ചർച്ചകൾ നടക്കുന്ന സമയത്തായിരുന്നു പൊളിറ്റ് ബ്യൂറോയിലേക്കുള്ള അദ്ദേഹത്തിൻ്റെ കടന്നുവരവ്. സോവിയറ്റ് യൂണിയൻ്റെ തകർച്ചയുടെ പശ്ചാത്തലത്തിൽ ‘ചരിത്രത്തിൻ്റെ അന്ത്യ’ത്തെക്കുറിച്ചും ലിബറലിസത്തിൻ്റെ വിജയത്തെക്കുറിച്ചും സംസാരമുണ്ടായി. ഫാസിസ്റ്റ് ആർ.എസ്.എസിൻ്റെ നേതൃത്വത്തിൽ രാഷ്ട്രീയ വലതുപക്ഷ ശക്തികൾ ഇന്ത്യയിൽ ശക്തിപ്രാപിച്ച ഘട്ടം കൂടിയായിരുന്നു അത്. കൂട്ടായ നേതൃത്വത്തോടൊപ്പം, സഖാക്കളിൽ പ്രതീക്ഷ ഉണർത്താനും കഴിയുന്ന പ്രത്യയശാസ്ത്ര വ്യക്തതയോടെ സിപിഐ-എമ്മിനെ നയിച്ചു. സാമ്രാജ്യത്വം, നവലിബറൽ സാമ്പത്തിക നയങ്ങൾ, വർഗീയത, ഹിന്ദുത്വ പ്രത്യയശാസ്ത്രം എന്നിവയെക്കുറിച്ചുള്ള ഈ കാലഘട്ടത്തിലെ അദ്ദേഹത്തിൻ്റെ രചനകൾക്ക് വലിയ പ്രസക്തിയുണ്ട്. ഇന്ത്യയിലെ സഖ്യരാഷ്ട്രീയത്തിൻ്റെ കാലഘട്ടത്തിൽ, നയങ്ങളും പൊതുമിനിമം പരിപാടിയും രൂപീകരിക്കുന്നതിൽ അദ്ദേഹം ഒരു പ്രധാന പങ്ക് വഹിച്ചു, പ്രത്യേകിച്ചും 2004ൽ ഒന്നാം യുപിഎ സർക്കാർ രൂപീകരിച്ചപ്പോൾ. യുപിഎ ഗവൺമെൻ്റിൻ്റെ ആദ്യ ഭരണകാലത്ത്, ദേശീയ തൊഴിലുറപ്പ് പദ്ധതി, വനാവകാശ നിയമം, വിവരാവകാശ നിയമം തുടങ്ങിയ പുരോഗമന നിയമങ്ങൾ നടപ്പാക്കുന്നത് ഉറപ്പാക്കാൻ ഇടതുപക്ഷത്തിൻ്റെ ശക്തി പ്രയോജനപ്പെടുത്താൻ കഴിഞ്ഞു.

12 വർഷം പാർലമെൻ്റേറിയൻ എന്ന നിലയിൽ, രാജ്യത്ത് വർഗീയ-കോർപ്പറേറ്റ് ബി.ജെ.പി ഭരണത്തിനെതിരായ ഏറ്റവും ഫലപ്രദമായ ശബ്ദങ്ങളിൽ ഒരാളായി അദ്ദേഹം മാറി, കൂടാതെ പല അവസരങ്ങളിലും ഗവൺമെൻ്റിനെ കൂച്ചുവിലങ്ങിടുകയും ചെയ്തു. തൊഴിലാളിവർഗത്തിൻ്റെയും കർഷകരുടെയും അടിച്ചമർത്തപ്പെട്ട ജനങ്ങളുടെയും പ്രശ്നങ്ങളിൽ അദ്ദേഹം പാർലമെൻ്റിലും തെരുവുകളിലും പ്രചോദനാത്മക സാന്നിധ്യമായിരുന്നു. പ്രത്യേകിച്ചും, ഭൂമി ഏറ്റെടുക്കൽ ഓർഡിനൻസിനെതിരായ പ്രതിഷേധത്തിനിടയിലും കർഷകർക്ക് പിന്തുണയുമായി പ്രതിപക്ഷ പാർട്ടികളെ അണിനിരത്തിയും അദ്ദേഹം വഹിച്ച പങ്ക് ശ്രദ്ധേയമാണ്. രാജ്യത്തെ ജനതയെ ഭിന്നിപ്പിക്കുന്ന പൗരത്വ ഭേദഗതി നിയമത്തിനെതിരായ പ്രതിരോധം കെട്ടിപ്പടുക്കുന്നതിലും, ഭരണഘടന, മതേതരത്വം, ജമ്മു കശ്മീരിലെ ജനങ്ങളുടെ അവകാശങ്ങൾ, സംസ്ഥാനങ്ങളുടെ ഫെഡറൽ അവകാശങ്ങൾ, പൗരാവകാശങ്ങൾ, അടിച്ചമർത്തപ്പെട്ടവരുടെ അവകാശങ്ങൾ എന്നിവ സംരക്ഷിക്കുന്നതിലും അദ്ദേഹം വഹിച്ച പങ്ക് എടുത്ത് പറയേണ്ടതാണ്. പൊതു സ്വത്തുക്കളുടെ സ്വകാര്യവൽക്കരണം, ഭക്ഷ്യസുരക്ഷ, നോട്ട് നിരോധനത്തിൻ്റെ അപകടങ്ങൾ, ജിഎസ്ടി തുടങ്ങിയ വിഷയങ്ങളിലും കോർപ്പറേറ്റ് ചങ്ങാത്തത്തിനെതിരെയും അദ്ദേഹം ശക്തമായ ശബ്ദമുയർത്തി. സാമ്രാജ്യത്വത്തെയും ഫാസിസത്തെയും മുതലാളിത്ത വികസനത്തിൻ്റെ നവലിബറൽ പാതയെയും ചെറുക്കാൻ പ്രത്യയശാസ്ത്രപരമായി അവരെ സജ്ജരാക്കുന്ന ഒരു മികച്ച അധ്യാപകൻ കൂടിയായിരുന്നു അദ്ദേഹം. തൊട്ടുകൂടായ്മ, സാമൂഹിക അടിച്ചമർത്തൽ, വിവേചനം എന്നിവയ്‌ക്കെതിരായ പോരാട്ടവുമായി വർഗസമരത്തെയും കൂട്ടിയിണക്കേണ്ടതിൻ്റെ ആവശ്യകതയെക്കുറിച്ചുള്ള ചിന്തയുടെ വ്യക്തതയും വേറിട്ടുനിൽക്കും. അന്താരാഷ്‌ട്ര കമ്മ്യൂണിസ്റ്റ് പ്രസ്ഥാനവുമായും ലോക നേതാക്കളുമായും അദ്ദേഹം നടത്തിയ ഇടപെടലുകൾ ശ്രദ്ധേയമാണ്.

നവലിബറൽ സാമ്പത്തിക നയങ്ങൾ നടപ്പാക്കിയതോടെ കാർഷികമേഖലയിൽ ഉയർന്നുവരുന്ന വൈരുദ്ധ്യങ്ങളെക്കുറിച്ചുള്ള അദ്ദേഹത്തിൻ്റെ ഉൾക്കാഴ്ചകൾ, ഭൂരഹിതരും കർഷകത്തൊഴിലാളികളും പാവപ്പെട്ട കർഷകരും ഐക്യപ്പെടണമെന്ന വസ്തുത ശരിയായ കോർപ്പറേറ്റ് വിരുദ്ധ നിലപാട് വികസിപ്പിക്കാൻ സഹായിച്ചു. ഒരു പൊതു ശത്രുവിനെ പരാജയപ്പെടുത്തുക എന്ന ലക്ഷ്യം നിറവേറ്റുന്നതിന് വിശാലമായ ഐക്യം കെട്ടിപ്പടുക്കേണ്ടതിനെക്കുറിച്ചും അദ്ദേഹം ഊന്നിപ്പറഞ്ഞിരുന്നു. കാർഷിക വിപ്ലവം ജനകീയ ജനാധിപത്യ വിപ്ലവത്തിൻ്റെ അച്ചുതണ്ടാണെന്നും ശക്തമായ തൊഴിലാളി-കർഷക ഐക്യത്തിൻ്റെ പ്രാധാന്യത്തെക്കുറിച്ചും പാർട്ടി പരിപാടിയുടെ വാദത്തെ അദ്ദേഹം പലപ്പോഴും ലേഖനങ്ങളിലും പ്രസംഗങ്ങളിലും ചൂണ്ടിക്കാട്ടിയിരുന്നു.

സഖാവ് സീതാറാം ഇന്ത്യയിലെ ഹിന്ദുത്വ ഫാസിസ്റ്റ് ശക്തികളുടെ ഉയർച്ചയെ ആഗോള ധനകാര്യത്തിൻ്റെ ഉയർച്ചയും ആധിപത്യവുമായി നിരന്തരം ബന്ധപ്പെടുത്തിയാണ് സംസാരിച്ചിരുന്നത്. അതേസമയം തൊഴിലാളി-കർഷക സഖ്യത്തിന് മാത്രമേ ഈ വിഭജന ഫാസിസ്റ്റ് ശക്തികളെ ചെറുക്കാനും പരാജയപ്പെടുത്താനും കഴിയൂ എന്ന് ആവർത്തിച്ചു.

Also Read- മോദിയുടെ മുഖംമൂടി അ‍ഴിച്ചുമാറ്റിയ പോരാളി, 2024ലെ ബിജെപി മുന്നേറ്റത്തിനെ തടയിട്ട വിപ്ലവകാരി

വ്യക്തിപരമായി, എനിക്ക് അദ്ദേഹവുമായി മൂന്ന് പതിറ്റാണ്ട് നീണ്ട ബന്ധമുണ്ട്. 1995-ൽ ജവഹർലാൽ നെഹ്‌റു യൂണിവേഴ്‌സിറ്റിയിലെ വിദ്യാർത്ഥിയായിരിക്കെ സ്റ്റുഡൻ്റ്‌സ് ഫെഡറേഷൻ ഓഫ് ഇന്ത്യ സംഘടിപ്പിച്ച ഒരു പൊതുയോഗത്തിലാണ് ഞാൻ അദ്ദേഹത്തെ ആദ്യമായി കാണുന്നത്. എൻ്റെ ദശാബ്ദക്കാലത്തെ യൂണിവേഴ്‌സിറ്റി ജീവിതത്തിൽ, രാഷ്ട്രീയ സംഭവവികാസങ്ങളെക്കുറിച്ചുള്ള റപ്പോർട്ടിങ്ങിനിടെ അദ്ദേഹം സദസ്സിനെ ആകർഷിച്ച എണ്ണമറ്റ സന്ദർഭങ്ങളുണ്ട്. ജെഎൻയു സ്റ്റുഡൻ്റ്‌സ് യൂണിയനിലേക്കുള്ള തിരഞ്ഞെടുപ്പിന് ശേഷം വന്ന പൊതുതെരഞ്ഞെടുപ്പിൽ ഏറ്റവുമധികം ആകാംക്ഷയോടെയാണ് യെച്ചൂരിയുടെ പ്രസംഗത്തിനായി വിദ്യാർഥി സഖാക്കൾ കാത്തിരുന്നിട്ടുള്ളത്. ഇത് സാധാരണയായി സംഘടിത ഇടതുപക്ഷത്തിന് അനുകൂലമായി നിർണ്ണായക മുന്നേറ്റം നൽകുന്ന തിരഞ്ഞെടുപ്പ് പ്രചാരണം ആയിരുന്നു; അദ്ദേഹത്തിന്‍റെ യോഗങ്ങൾക്ക് വലിയ ജനക്കൂട്ടത്തെ ആകർഷിക്കാനായി.

വിദ്യാർത്ഥി പ്രസ്ഥാനത്തിൽ പ്രവർത്തിക്കുന്ന ഘട്ടത്തിൽ, ജെഎൻയുവിൽ ജനാധിപത്യം എങ്ങനെ പ്രവർത്തിക്കുന്നുവെന്ന് ഊന്നിപ്പറയാൻ കഴിഞ്ഞിട്ടുള്ള നേതാവായിരുന്നു യെച്ചൂരി. മൂന്ന് തവണ അദ്ദേഹം യൂണിയൻ പ്രസിഡൻ്റായി തിരഞ്ഞെടുക്കപ്പെട്ടു. അടിയന്തരാവസ്ഥക്കാലത്ത് വിദ്യാർഥികളുടെ അവകാശങ്ങൾ ഹനിക്കപ്പെട്ടത് എങ്ങനെയെന്ന് ഇന്ദിരാഗാന്ധിയെ സാക്ഷിനിർത്തി വായിച്ചുകേൾപ്പിച്ചു. 1977ലെ തിരഞ്ഞെടുപ്പിലെ തോൽവിക്ക് ശേഷവും സർവകലാശാലയുടെ ചാൻസലർ എന്ന നിലയിൽ ഇന്ദിര തുടർന്നപ്പോഴാണ് യെച്ചൂരിയുടെ നേതൃത്വത്തിൽ വിദ്യാർഥികൾ പ്രതിഷേധവുമായി ഇന്ദിരാഗാന്ധിയുടെ വസതിയിൽ എത്തിയത്.

അസാധാരണമായ അക്കാദമിക് യോഗ്യതയുള്ള വ്യക്തിയായിരുന്ന അദ്ദേഹത്തിന് അടിയന്തരാവസ്ഥയ്ക്ക് തൊട്ടുപിന്നാലെ അതിവേഗം മാറിക്കൊണ്ടിരിക്കുന്ന രാഷ്ട്രീയ സംഭവവികാസങ്ങൾ കാരണം പിഎച്ച്ഡി ഉപേക്ഷിക്കേണ്ടിവന്നു. ഞാൻ പിഎച്ച്‌ഡി പൂർത്തിയാക്കണമെന്നും അത് പാതിവഴിയിൽ ഉപേക്ഷിക്കരുതെന്നും അദ്ദേഹത്തിൻ്റെ നിർബന്ധം ഞാൻ സ്‌നേഹപൂർവം ഓർക്കുന്നു; യഥാർത്ഥത്തിൽ എനിക്ക് അത് പൂർത്തിയാക്കാൻ കഴിഞ്ഞു. ഞാൻ എൻ്റെ അധ്യാപക ജോലി ഉപേക്ഷിച്ച് പാർട്ടിയിലും അഖിലേന്ത്യാ കിസാൻ സഭയിലും മുഴുവൻ സമയ പ്രവർത്തകനായി മാറിയത് മുതൽ, പ്രസ്ഥാനത്തെ കുറിച്ചും വിശാലമായ സമവായം കെട്ടിപ്പടുക്കുന്നതിനും ഞങ്ങൾ നിരവധി തവണ ചർച്ചകൾ നടത്തിയിട്ടുണ്ട്. ഞങ്ങളുടെ പ്രതികരണത്തിന് അർഹമായ പ്രശ്നങ്ങൾ അദ്ദേഹം ആലോചിക്കുകയോ ശ്രദ്ധയിൽപ്പെടുത്തുകയോ ചെയ്ത സന്ദർഭങ്ങളും ഉണ്ടായിട്ടുണ്ട്. കഴിഞ്ഞ മൂന്ന് ദശാബ്ദങ്ങളിൽ, ചിലപ്പോഴൊക്കെ വ്യത്യസ്ത സംവാദങ്ങളുടെ എതിർ പക്ഷത്തായിരുന്നിട്ടും, അദ്ദേഹം എപ്പോഴും ഊഷ്മളമായ പെരുമാറ്റം നിലനിർത്തുകയും എൻ്റെ ആശയങ്ങൾ രൂപപ്പെടുത്തുന്നതിൽ പങ്കുവഹിക്കുകയും ചെയ്തു.

സമാധാന പ്രക്രിയയുടെ പുരോഗതി സംബന്ധിച്ച് നാഗാ ജനതയുടെ നിർദ്ദേശപ്രകാരമാണ് അദ്ദേഹവുമായുള്ള എൻ്റെ അവസാന സംഭാഷണം, താൻ പരിഹരിച്ചുവെന്ന തൻ്റെ ഉയർന്ന അവകാശവാദങ്ങൾ ചോദ്യം ചെയ്ത് പ്രധാനമന്ത്രിക്ക് കത്തെഴുതാൻ പ്രതിപക്ഷ പാർട്ടികളെ ഒന്നിപ്പിക്കാൻ ഇടപെടുമെന്ന് അദ്ദേഹം ഉറപ്പുനൽകിയിരുന്നു. എന്നാൽ അത് പൂർത്തിയാകുന്നതിന് മുമ്പ് അദ്ദേഹം മടങ്ങി. വിട പ്രിയ സഖാവേ. റെഡ് സല്യൂട്ട് സഖാവ്. സീതാറാം!

(അഖിലേന്ത്യാ കിസാൻ സഭയുടെ ജനറൽ സെക്രട്ടറിയായ വിജു കൃഷ്ണൻ ന്യൂസ് ക്ലിക്കിൽ എഴുതിയ ലേഖനത്തിന്‍റെ പരിഭാഷ)