കോഴിക്കോട് ട്രെയിന്‍ തട്ടി വിദ്യാര്‍ത്ഥിക്ക് ദാരുണാന്ത്യം. കോഴിക്കോട് പേരാമ്പ്രയിലെ ബാബുരാജിന്റെ അമല്‍രാജാണ് (21) മരിച്ചത്. കോഴിക്കോട് ഹോട്ടല്‍മാനേജ്മെന്റ് വിദ്യാര്‍ഥിയാണ് അമല്‍രാജ്.
പുലര്‍ച്ചെ രണ്ട് മണിയോടെയാണ് അപകടമുണ്ടായത്. വടകരയ്ക്കടുത്ത് മുക്കാളി റെയില്‍വേ ഗേറ്റിനുസമീപമാണ് അപകടം. സംഭവത്തെ തുടര്‍ന്ന് റെയില്‍വെ പൊലീസ് സ്ഥലത്തെത്തി. മൃതദേഹം പോസ്റ്റ്‌മോര്‍ട്ടത്തിനുശേഷം ബന്ധുക്കള്‍ക്ക് വിട്ടുനല്‍കും.
ട്രെയിന്‍ സമയങ്ങളില്‍ താല്‍കാലിക മാറ്റങ്ങള്‍; ചില സ്റ്റോപ്പുകള്‍ റദ്ദാക്കും, ചില വണ്ടികള്‍ ഓടില്ല
തിരുവനന്തപുരം റെയില്‍വെ ഡിവിഷനില്‍ എഞ്ചിനിയിറിംഗ് ജോലികള്‍ നടക്കുന്നതിനാല്‍ ജനുവരി 18നും 26 നും ഇടയില്‍ ട്രെയിന്‍ സര്‍വ്വീസുകള്‍ തടസപ്പെടും.
എറണാകുളത്തിനും ഗുരുവായൂരിനുമുടയിലാണ് ട്രെയിനുകളുടെ ഷെഡ്യൂളുകളില്‍ താല്‍കാലിക മാറ്റം വരുന്നത്. ചില ട്രെയിനുകള്‍ പുറപ്പെടുന്ന സ്റ്റേഷനുകളില്‍ മാറ്റമുണ്ട്. നാലു ട്രെയിനുകള്‍ പൂര്‍ണമായും റദ്ദാക്കിയതായി ദക്ഷിണ റെയില്‍വെ അറിയിച്ചു. ജനുവരി 18,19,25,26 എന്നീ തീയ്യതികളിലാണ് ട്രെയിന്‍ ഗതാഗതം ഭാഗികമായി തടസപ്പെടുന്നത്.
പ്രധാന മാറ്റങ്ങള്‍
ചെന്നൈ എഗ്മോറില്‍ നിന്ന് ഗുരുവായൂരിലേക്കുള്ള എക്സ്പ്രസ് ട്രെയിന്‍ (16127) ജനുവരി 18 നും 25 നും ചാലക്കുടിയില്‍ യാത്ര അവസാനിപ്പിക്കും. ചാലക്കുടി മുതല്‍ ഗുരുവായൂര്‍ വരെയുള്ള യാത്ര റദ്ദാക്കും.
ചെന്നൈ സെന്‍ട്രലില്‍ നിന്ന് ആലപ്പുഴയിലേക്കുള്ള സൂപ്പര്‍ ഫാസ്റ്റ് എക്സ്പ്രസ് (22639) 18, 25 തിയ്യതികളില്‍ പാലക്കാട് യാത്ര അവസാനിപ്പിക്കും. ആലപ്പുഴയിലേക്ക് തുടര്‍ യാത്രയുണ്ടാവില്ല.
തിരുവനന്തപുരം സെന്‍ട്രലില്‍ നിന്ന് ഗുരുവായൂരിലേക്കുള്ള എക്സ്പ്രസ് ട്രെയിന്‍ (16342) 18 നും 25 നും എറണാകുളം ജംഗ്ഷനില്‍ യാത്ര അവസാനിപ്പിക്കും.
കരൈക്കലില്‍ നിന്ന് എറണാകുളം ജംഗ്ഷനിലേക്കുള്ള എക്സ്പ്രസ് (16187) പാലക്കാട് വരെയാണ് യാത്ര ചെയ്യുക. പാലക്കാട് നിന്ന് എറണാകുളത്തേക്ക് തുടര്‍ യാത്ര ഇല്ല.
മധുരയില്‍ നിന്ന് ഗുരുവായൂരിലേക്കുള്ള എക്സ്പ്രസ് (16327) ഈ ദിവസങ്ങളില്‍ ആലുവയിലും യാത്ര അവസാനിപ്പിക്കും.
ആലപ്പുഴ-ചെന്നൈ സെന്‍ട്രല്‍ എക്സ്പ്രസ് (22640) ജനുവരി 19,26 ദിവസങ്ങളില്‍ പാലക്കാട് നിന്നാണ് യാത്ര പുറപ്പെടുക. സമയം രാത്രി 7.50
എറണാകുളം-കണ്ണൂര്‍ എക്സ്പ്രസ് (16305) ജനുവരി 19 നും 26 നും തൃശൂരില്‍ നിന്ന് രാവിലെ 7.16 ന് പുറപ്പെടും.
ഗുരുവായൂര്‍-തിരുവനന്തപുരം എക്സ്പ്രസ് 19 നും 26 നും എറണാകുളത്ത് നിന്ന് രാവിലെ 5.20 നാണ് തിരുവനന്തപുരത്തേക്ക് പുറപ്പെടുക.
എറണാകുളം-കരൈക്കാല്‍ എക്സ്പ്രസ് (16188) ഈ തീയ്യതികളില്‍ പാലക്കാട് നിന്ന് പുലര്‍ച്ചെ 1.40 നാണ് പുറപ്പെടുക.
ഗുരുവായൂര്‍-മധുരൈ എക്സ്പ്രസ് (16328) 19 നും 26 നും ആലുവയില്‍ നിന്ന് രാവിലെ 7.24 ന് പുറപ്പെടും.
റദ്ദാക്കുന്ന ട്രെയിനുകള്‍
ജനുവരി 18 നും 26 നും ഇടയില്‍ നാലു ട്രെയിനുകള്‍ റദ്ദാക്കും. എറണാകുളം-ഷൊര്‍ണൂര്‍ സ്പെഷ്യല്‍ (06018) ജനുവരി 18, 25 തിയ്യതികളില്‍ ഓടില്ല. ജനുവരി 19 ന് സര്‍വ്വീസ് നടത്തേണ്ട ഷൊര്‍ണൂര്‍-എറണാകുളം സ്പെഷ്യല്‍ (06017), ഗുരുവായൂര്‍-എറണാകുളം പാസഞ്ചര്‍ (06439), കോട്ടയം-എറണാകുളം പാസഞ്ചര്‍ (06434) എന്നീ ട്രെയിനുകള്‍ റദ്ദാക്കിയതായി ദക്ഷിണ റെയില്‍വെ വെബ് സൈറ്റില്‍ അറിയിച്ചു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
